جريمة ترتكب بحق الشباب.. رزق الله: "عايزين مستشفى مجانى بالقبة.. ولازم نقنن التوكتوك"

قال الدكتور رفيق رزق الله، مرشح حزب حراس الثورة على مقعد حدائق القبة، إن هناك العديد من طلبات الإحاطة التى سيتقدم بها فى البرلمان حال فوزه فى الانتخابات التكميلية.

وأوضح مرشح حزب حراس الثورة، فى تصريحات خاصة لـ"برلمانى"، قائلا: "فى أحلام ليا عايز أحققها، أولها إنشاء مستشفى تعالج أهالى حدائق القبة بالمجان، خاصة أن وزارة الصحة لها مستشفى بالدائرة ولكن لا يوجد بها دكاترة ولا غيره".

وأضاف: "الحاجة التانية، إزاى وزير الداخلية سايب التكاتك فى الشوارع كده، المفروض يحصل تقنين لأوضاع التكاتك.. التوكتوك أمر واقع ولازم تقنينه، لكن لو سبناه بالشكل ده يبقى جريمة ترتكب بحق الشباب، وفى يوم من الأيام هتعرفوا خطورته على البلد، لأنه حاليا بيطلع جيل فاسد شباب بتسيب الدراسة عشان تشتغل على التوكتوك بمقابل 300 جنيه يوميا".

وطالب رزق الله من محافظ القاهرة تخصيص مساحة أرض للباعة الجائلين المتواجدين فى شارع بورسعيد، خاصة أن الأرض موجودة بالفعل.

وتابع: "أنا لا محتاج لمنصب ولا لجاه ومعايا شهادتى الحمد الله، وأستاذ ورئيس مجلس إدارة مستشفى كبير بفضل الله، لكن واجبى وواجب كل مصرى حساس إنه يستطيع أنه يغير يبقى لازم يغير ويضحى".