بالفيديو.. بعد دراسة فرض "10 جنيه" لصالح القضاة.. مواطنون: "هو إحنا لاقيين ناكل"

تدرس الآن اللجنة التشريعية بالبرلمان مشروع قانون زيادة موارد صندوق الرعاية الصحية للقضاة، وذلك بفرض رسوم تقدر بـ10 جنيهات مصرى على المواطن والذى قدمته الحكومة للبرلمان لمناقشته وإقراره .



قامت كاميرا "برلمانى" باستطلاع رأى المواطنين عن هذه الزيادة .
قال أحد المواطنين ويدعى جلال: "هما القضاه ناقصين 10 جنيه من الناس الغلابة هما المفروض يعطوا لمين للناس الغلابة ولا للقضاة ..الناس الغلابة هى اللى محتاجة الـ10 جنيه".

وتابع أحد المواطنين :"إحنا هنقول إيه يعنى أصل كلامى مش هيغير حاجة..عادى".

ويضيف مواطن آخر يدعى عبد الله محمود: "كل حاجة بقت غالية وأهو قرار بيطلعوه وبيمشى على الكل إحنا هنعمل إيه؟ إحنا عايشين على الله وطالعين على المعاش وبنكافح الحمد لله ومش بهتم باللى بيحصل وبحاول اتعايش مع الدنيا عشان اقضى الأيام اللى فاضلة لى وخلاص".

وقال على محمود: "كل بياع بيبيع الحاجة بالتمن اللى على مزاجه وكله على قفه الغلبان اللى بيقبض معاش آخر الشهر بيشترى به أدوية إحنا هنجيب أدوية ولا نأكل عيالنا ولا عيال عيالنا..لو فيه كنا هندفع يعنى إيه 10 جنيه".
وقالت سيدة مسنة تدعى أم بدرية وتعمل بائعة خضار: "نعمل إيه طيب حاجة مفروضة علينا ..الناس تعبانة وفيه ناس ماشية بالعافية ياريتها تيجى على العشرة جنيه والدنيا تتصلح والبلد تستقر".