مواطنون عن ارتفاع سعر كروت الشحن: "نواب البرلمان مافكروش فى الناس الغلابة"

بالتزامن مع إقرار البرلمان لقانون الضريبة على القيمة المضافة ارتفعت أسعار كروت شحن المحمول، مما أثار جدلاً واسعا فى الشارع المصرى، وأشارت أصابع الاتهام لكل من التجار وشركات المحمول، فى حين إصرار الحكومة على أن الأسعار لم ترتفع بعد إلا أن المواطنين يستغيثون من ارتفاع أسعارها.



كاميرا "برلمانى" طافت بدوائر مصر المحروسة لرصد رد فعل المواطنين حول تلك القضية فالتقينا محمد عبد الله يعمل بائعا وقال: "مافيش كروت شحن كلها غليت واختفت من السوق، آخر كارت جبته بـ55 جنيها ويارتنى لقيته، هما اللى فى البرلمان مابصوش ليه للناس البسيطة، هما كده بيموتوا فينا أكثر من اللازم".

وقال آخر: "كنت بجيب الكارت بـ10 ونص دلوقتى بـ12 و13 جنيه ومافيش كروت أصلاً متوفرة"، أما حمدى يعمل بائعا فقال "نفسى أشوف محمد العقاد النائب بتاعى ما نعرفوش أصلاً"، متابعا: "فى ناس بتقول إن التجار هما السبب وغلوا سعر الكروت، هما بيرفعوا الأسعار وبس، ياريت لو لازم يزودوا الأسعار يخلوها 10 ونص مش أكثر الواحد مش لاقى عشان يزودوا كروت الشحن".

فيما أقسم محمود محمد قائلاً: "أقسم بالله بعت التليفون عشان كروت الشحن غليت، كنت بجيب الكارت الفكة بـ3 دلوقتى بقى 4 جنيه، شوية هيقولوا بـ8 جنيه لا أحسن لى أبيعه".

وتقول فايزة الفرماوى من الجيزة، إن بعض التجار استغلوا ما حدث وزودوا سعر كارت الشحن، كما بلغت رسالة لنائب دائرتها قالت فيها: "أنا معرفش نائب دائرتى ولا بشوفوا بس بقولوا إنت خلاص بقيت نائب فى البرلمان ومسئول فاتقى الله فى أهالى دائرتك".

كما التقينا أحمد محمود يعمل موظفا قال: "البرلمان مافكرش فى الشعب خالص قبل ما يوافق على حاجات الشعب ما يقدرش يستغنى عنها رغم أن المفروض الضرائب دى تكون على حاجات تانية خالص وعلى فئة معينة من الشعب، أنتم كدا بتمسكوا روح الشعب وكل حاجة غالية"، متابعا: "آخر مرة جبنا فيها كارت شحن كان بـ12 ونص لأن التجار بتبدأ تغلى الكروت قبل ما القرار نفسه ينزل، وياريت لو هتنزلوه يكون جنيه فوق قيمته مش أكثر".

وقال نصر "بائع": "البرلمان خد قراره وظلم المواطن كل حاجة غالية فى البلد، آخر مرة جبت كارت كان بـ10 جنيه، دلوقتى مفيش كروت ومش لاقيها"، كما وجه رسالة لنائب دائرته: "حرام خلى بالك من الناس اللى انتخبوك".

أما رمضان فتساءل: "ليه يغلوا كروت الشحن بعد ما كنت بجيبها بـ10 بقت بـ12 ليه كده حرام كل حاجة غليت وإللى فى البرلمان كل واحد أعد على الكرسى مالوش دعوة بغيره من المواطنين الغلابة إللى انتخبوه".

وتقول سامية محمد: "البرلمان أصلاً مخدش بالوا من المواطن فى ناس معهاش تشترى الكارت وبقول للنواب فى مجلس الشعب ياريت ترخصوا الحاجة ىشوية كل حاجة ومش لاقين حتى كروت الشحن".

أما "ذكى" فوجه رسالة مباشرة لنواب المجلس قال فيها: "أنا بكلم النائب بتاعى بكل صراحة وبقول له زيادة الأسعار خلت الناس فوق ماتتحمل هدفع إيه ولا إيه لما أزود الضربية على المواطن هيجيب منين، يا نواب المجلس كلما المسئولين الموطن معدش لاقى".

ووجه آخر رسالة للنواب البرلمانيين قال فيها: "خلوا بالكوا من أسعار الكروت مش معقول نعيش فى أزمات على طول ياريت نراعى مصالح الشعب".

وقال أحمد يعمل "سائق": " الضريبة المضافة دى أصلاً ماكنش وقتها الواحد كان بيجيب الكارت بالعافية كان المفروض أعضاء البرلمان يعملوا حسابهم على كده، حرام أجيب كارت الشحن بـ15 جنيه ليه، ياريت المجلش يناقش غلاء الأسعار الدور الجاى حتى لو يريحونا سنة وبعدين يولعوا فينا أحنا تعبنا".

وكان الجهاز القومى لتنظيم الاتصالات ووزارة المالية أعلنا اليوم الثلاثاء، بعد تطبيق ضريبة القيمة المضافة تحديد سعر كارت فئة الـ10 جنيهات، بـ11 جنيها، على أن يكون هناك رصيد إضافى قدره 40 قرشا، وتحصيل ضريبة بقيمة 60 قرشا فقط على الكارت.

أما الكارت 25 جنيها، فيباع بسعر 27.5 جنيه، مع رصيد إضافى جنيه واحد، وتحصيل ضريبة 1.5 جنيه، والكارت فئة 50 جنيها فإن الضريبة المستحقة تبلغ فقط 3 جنيهات، مع رصيد إضافى بقيمة جنيهين، على أن يباع بسعر 55 جنيها للمواطنين.

وبالمثل فى كارت الـ100 جنيه سيباع للمواطنين بسعر 110 جنيهات على أن تمنح شركات المحمول المواطنين رصيد بقيمة 100 جنيه ورصيد إضافى بقيمة 4 جنيهات والضريبة 6 جنيهات فقط.