ارتفاع أسعار الأدوات المدرسية.. تاجر: السبب الدولار.. ومواطنون: الأسعار "زفت" (فيديو)

يعتبر شارع الفجالة برمسيس "مول" الأدوات المدرسية التى يذهب إليها أولياء الأمور كل عام مع اقتراب الدراسة لشراء احتياجات أبنائهم بسعر بسيط بعيدًا عن غلاء تجار القطاعى، لكن هذا العام شهد السوق ارتفاعا كبيرا فى أسعار الأدوات المدرسية عن العام الماضى.

رصدت كاميرا موقع "برلمانى" أسعار الأدوات المدرسية بسوق الفجالة والتقت ببائع يدعى سيد والذى قال: "الأسعار السنة دى ارتفعت عن السنة اللى فاتت بكتير واللى كان سعره بـ10 جنيه النهارده بـ15 جنيه وسبب ارتفاع الأسعار هو ارتفاع الدولار وعامة مفيش رقابة من الحكومة على التجار وهما بيخزنه البضاعة وينزلوها بسعر عالى والأسعار تعتبر زادت عن السنة اللى فاتت بنسبة 65%".

عن الأسعار الأدوات المدرسية يقول: "كشكول 60 ورقة سعره 140 قرش و80 ورقة عامل 180 قرش و100 ورقة عامل 2 جنيه وربع والكراسة بين 60 و80 قرش، والقلم الجاف بيبدأ من 75 قرش لـ2.5 جنيه، وأقلام الألوان بتبدأ من 2 جنيه ونصف إلى 12 جنيه حسب نوع الأقلام".

وأضاف: "براية والأستيكة ما بين 50 قرش و2 جنيه ونصف، والزمزمية ما بين 10 جنيه و15 جنيه و27 جنيه، والمقلمة بتبدأ من 5 جنيه لحد 15 جنيه، والجلاد من 2.5 جنيه لحد 3.5 جنيه، والمسطرة بتبدأ من 50 قرش لحد 2 جنيه".
عن حالة البيع والشراء بالسوق قال سيد: "مفيش بيع زى الأول يعنى اللى كان بيشترى بضاعة بـ400 جنيه دلوقتى المبلغ ده مايعملش حاجة معاهم".

رصدت كاميرا موقع "برلمانى" آراء المواطنين بسوق الفجالة قال محمد: "الحاجات كويسة السنة لكنها غليت عن السنة اللى فاتت تقريبًا زادت بنسبة 15%".

قال المواطن سعيد محمود: "الأسعار زى الزفت وزادت نص عن السنة اللى فاتت والواحد بيشترى لأنه مجبر عليها نعمل إيه بنستلف ونجيب".

وقال مواطن آخر يدعى رمضان: "الأسعار السنة دى مرتفعة جدًا يعنى أنا مثلا عندى 5 عيال فى المدرسة مش عارف اشترى لهم منين والأجور تعبانة زى ما هى والأسعار بتزيد فى كل حاجة مش فى الأدوات المدرسية بس".

قال مواطن يدعى صلاح: "كل حاجة غليت والناس تعبت لكن بإيديها إيه".

عن رأى اللجنة الاقتصادية بمجلس النواب عن حقيقة ارتفاع سعر الأدوات المدرسية، قالت النائبة سارة عثمان عضو اللجنة الاقتصادية بمجلس النواب، إن سبب ارتفاع الأدوات المدرسية يرجع إلى جشع التاجر الذى يستغل بداية العام الدراسى الجديد برفع سعر البضاعة وليس السبب ارتفاع سعر الدولار.

وأضافت من خلال تصريح خاص لموقع "برلمانى" لابد من وجود ضبط للأسعار، ويجب على الأجهزة الرقابية النزول للشارع لمراقبة أسعار الأدوات المدرسية.

قال النائب عمرو غلاب عضو اللجنة الاقتصادية بمجلس النواب، ارتفاع الأسعار بهذا الشكل يرجع إلى طمع التجار وليس الدولار، والتاجر لديه مخزون من البضاعة المتبقية من العام الماضى والتى يطرحها مرة أخرى بالسوق مضيفًا عليها سعر خوفًا من زيادة سعر الدولار لكن ما ذنب المستهلك فى ذلك.

أضاف من خلال تصريح خاص بموقع "برلمانى" الحل لمواجهة ارتفاع الأسعار هو تصنيع الأدوات المدرسية بداخل مصر وكفاية استيراد كل شىء من الخارج، وكذلك يجب تشجيع مصادر دخل من الدولار مثل السياحة وقناة السويس وغيرها وتحسينها.