الأمومة تزين طرقات البرلمان.. رسائل النواب لست الحبايب فى "عيد الأم" (فيديو)

أيام قليلة تفصلنا عن مناسبة عيد الأم 21 مارس، إذ تحتفل دول العالم بهذه المناسبة، تقديرًا للجهود المبذولة من الأمهات، وفى هذا الإطار يرصد "برلمانى" ذكريات أعضاء مجلس النواب مع هذه المناسبة، والطقوس التى اعتادوا عليها فيها.

سعيد حساسين: كنت أتمنى أمى تشوف نجاحى

فى البداية، قال سعيد حساسين عضو مجلس النواب عن دائرة كرداسة بالجيزة: "أقول لكل أم مصرية كل سنة وأنتى طيبة، والحقيقة الأم حاجة مهمة بالحياة، وأنا ولدتى متوفية وكنا نستفيد من وجودها ونصائحها، وهناك حديث يقول بعد وفاة الأم، ينادى منادى من السماء يقول"يا ابن آدم ماتت من كنا نرحمك من أجلها، اعمل صالحا نرحمك من أجله"، تخيلوا أن ربنا بيرحم البنى آدم علشان الست الطيبة الغلبانة" .

وأضاف "حساسين": "بنشوف ناس كتيرة مهملين فى أمهاتهم ومعاملتهم سيئة، أنا والدتى توفت وأتمنى أنها كانت تكون عايشة دلوقتى وتشوف نجاحنا، وبقول لكل ولد وبنت إلا الأم، يعنى فعلا دعوتها مستجابة وهى اللى بتحب الخير وتتمنى أنك تكون أحسن واحد فى الدنيا، وبطلب من كل ولد وبنت رفقا بالأمهات لأن الأم كل حاجة فى الدنيا".

إلهام المنشاوى: كل سنة وأمهات مصر كلهم طيبين وبخير

بدورها ،قالت النائبة إلهام المنشاوى: كل سنة وأمهات مصر طيبين وبخير، عيد الأم مناسبة جميلة علينا كلنا، والأم من تتعب وتتحمل لصالح أولادها، و مناسبة عيد الأم تتويج واعتراف بالجميل، واقول لأمى "كل سنة وانتى طيبة وربنا يديكى الصحة" وهديتى لها هتكون سر.

أحمد على: عيد الأم مش يوم واحد.. وبجيب هدية كل يوم لأمى

وفى نفس السياق، قال أحمد على عضو مجلس النواب عن دائرة المرج، أقول لكل أم مصرية "كل سنة وأنتى طيبة وكل المصريين فخورين بيكى وخصوصا أمى، لأنها بالنسبة لى لها الدور الأكبر فى حياتى، وهى الأم والأب والخال والأخ وكل حاجة وكل حياتى".

وأضاف على لـ" برلمانى": "أنا يوميا وأنا نازل من البيت لازم أمر على أمى، وكمان وأنا راجع، وبالنسبة لى عيد الأم مش يوم، هو طول السنة، وأنا بجيب لها هدية كل يوم".

شادية ثابت: المناسبة تذكرنى بأغنية فايزة أحمد "ست الحبايب"

بدورها، قالت شادية ثابت عضو مجلس النواب عن دائرة إمبابة "كل سنة وكل سيدة مصرية بخير بمناسبة عيد الأم 21 مارس، الذى تعودنا عليه وغحنا صغيرين وكنا بنشوف حفلات بالمدارس، وكنا بنحضر الهدية لأمنا ودائما نتذكر أغنية فايزة أحمد ست الحبايب ياحبية وكانت حاجة وأحنا صغيرين وكان بيبقى يوم فرح بالشارع".

وتابعت النائبة شادية ثابت، "الوضع اختلف دلوقتى أنا أم لـ6 أولاد وكلهم بيجتمعوا ويجيبوا تورتة ويحضروا هدية وبيبقى يوم فرح بالبيت، وكل سنة وكل أم طيبية والأسر المصرية بخير وطيبة".

أحمد زيدان: "يوم 21 مارس هنزوز دور المسنين"

فيما قال أحمد زيدان كل عام وكل أمهات مصر بخير، وخلال يوم 21 مارس هيكون فيه زيارات بدور المسنين، لأن أمهات مصر يستحقوا كل تقدير واحترام لأنهم خلف كل مسؤول، وبدعو أن يكون فيه زيارات، متابعا: "أنا والدتى توفيت، وبعوض دة بتنظيم زيارات للأقارب، وود وتواصل، وكل عام ومصر طيبة.

عمرو الأشقر: هجمع أنا وإخواتى وأجيب هدية غير الكوبيات

كما قال عمرو الأشقر : "كل سنة وكل أم طيبة، وعيد الأم لمسة وفاء ومش هنقدر نوفى أى أم حقها؛ لأن الأم الأساس والمدرسة التى نتعلم ونخرج منها كلنا، وفضلها عظيم زى ما قال المولى سبحانه وتعالى و رسولنا، وكنت بجمع أنا وأخواتى ونجيب للأم هدية".

وتابع الأشقر: "هنغير موضوع الكوبيات وهنجمع أنا وأخواتى ونعمل لها مفاجأة، ويارب دايما تفضل الأم لمسة الحنان والعطاء بمجتمعنا المصرى".

عمرو أبو اليزيد: هديتى لأمى هتكون على حسب الإمكانيات

ووجه عمرو أبو اليزيد أمين سر لجنة الإسكان، التهنئة للأمهات بمناسبة عيد الأم "كل عام وأنتم بخير" قائلا: "والدى الله يرحمه كان معودنا على طقوس، وكان يشترى لنا هدايا لنسلمها لأمنا علشان تصحى من النوم تلاقى الهدية جنبها، ونقول لها كل سنة وانتى طيبة، ولما كبرنا غيرنا بحاجة أحسن، وكنت أجيب الهدية وأحضر لها الفطار وأقولها كل سنة وانتى طيبة، وبعمل مفاجاة، وبالليل بجبلها حلويات وبنسعدها من أول اليوم لآخر اليوم".

وتابع أبو اليزيد: "المفاجآت لها دور كبير والهدية فى يوم عادى جدا بتبسط الأم، مش شرط يوم المناسبة، هديتى السنة دى على حسب الإمكانيات، وأقصى إمكانياتى هجيب لها هدية".