يوسف الحسينى: من إمته جزر تيران وصنافير بقوا تبع السعودية.. السيسى لازم يتراجع

قال الإعلامى يوسف الحسينى تعليقا على إعلان الحكومة تبعية جزيرتى تيران وصنافير للسعودية :"فى ناس شغلتهم فى الحياة مبرراتيه، وهيموتوا على كده، إحنا مش عايزين نبوظ علاقتنا مع السعودية أحنا بس عايزين نفهم أمته الجزر دول تبع المملكة".

وأكد يوسف الحسينى مقدم برنامج "بصراحة" على "نجوم إف إم"، قائلا: "الإخراج السياسى لضم جزيرتى صنافير وتيران إلى السعودية كان خطأ.. لو الجزر دول تبع السعودية يبقى أحنا لينا أملاك هناك من أيام محمد على وإبراهيم باشا.

وتابع: "هناك معركة على السوشيال ميديا بسبب الجزيرتين، بس أحنا عندنا مبررتيه بامتياز، يعنى مثلا بالطريقة دى السودان تيجى تاخد حلايب، وليبيا لو لها حته تيجى تأخدها، لذلك الرئيس عبد الفتاح السيسى لازم يرجع فى موقفه، أنا لا أشكك فى مواقفه ولا وطنيته، ولكن مش معقولة أنام وأصحى ألاقى جزيرتين تبع مصر بقوا فى السعودية".