بـ"على هوى مصر"..عبد الرحيم على يعرض مكالمة بين صفوت حجازى وأبو إسماعيل تثبت تسليح رابعة

عرض الدكتور عبد الرحيم، على عضو مجلس النواب، تسجيل لمكالمة هاتفية بين صفوت حجازى وحازم صلاح أبو إسماعيل، وهما يتحدثان عن أن الجماعة الإسلامية بالكامل مسلحة، وأن حجازى بنفسه مسلح، ويحث حازم صلاح أبو إسماعيل ومجموعته على الانضمام لهم، ورد أبو إسماعيل: "هل تجزموا ببداية الصدام الآن، ولا تجيبونى وبعد كده من خلالى توصلوا لصلح؟".

وأشار عبد الرحيم على خلال لقائه ببرنامج "على هوى مصر"، على فضائية "النهار One"، مع الكاتب الصحفى خالد صلاح رئيس مجلس إدارة وتحرير "اليوم السابع"، إلى أن المكالمة الثانية بين نجل محمود إسماعيل القيادى السابق بالجماعة الإسلامية ووالدته، وهو يقول لها بأنهم جاهزون، وأخرى مع تاجر سلاح، يتحدثون عن أسعار الأسلحة، ومكالمة أخرى بين محافظى المنيا وكفر الشيخ وهما يعدان للاعتصامات الإقليمية بالمحافظات.

وتابع:"المكالمة مهداة للبرادعى وتم عرضها عليه فى حينها".

ونص المكالمة:

حجازى: السلام عليكم

أبو إسماعيل: أهلا ومرحبا وعليكم السلام ورحمة الله وبركاته.. الحقيقة انتبهت متأخرا لمكالمتك فاتصلت بحضرتك.. بس يبدو الوقت كان متأخر جداً

حجازى: معلش والله سامحنى واحنا كنا فى رابعة قاعدين مسمعتش

أبو إسماعيل: ربنا معاكو

حجازى: إزى حضرتك

أبو إسماعيل: الحمد لله طمنى على الأخبار ماشى كويس الحمد لله

حجازى: والله الحمد لله رب العالمين أنا طلبت حضرتك لأن الناس كلها بتسألنى عليك .."الشيخ حازم فين"؟

أبو إسماعيل: أيوه طبعا

حجازى: أنا مش عارف أقولهم إيه.. هههه حبيت اتصل بيك أسألك أقولهم إيه؟.. كل الناس الكبار حتى الشباب الصغيرين، يعنى الشباب امبارح موجودين، طلاب الشريعة وشباب من حازمون وكل الناس بتسأل هو الشيخ حازم فين؟..

أبو إسماعيل: صحيح هو بس الفكرة أن عدم وضوح المسار شوية هو اللى مخلى الواحد مش عارف زى يوم 25/1 هو نفس مشكلة 25 يناير فالصورة الحقيقية لما بتبقى فيها إبهام بتبقى المسائل الحقيقة غير جيدة، فأنا مش عارف هما ناويين يعملوا إيه لغاية دلوقتى،النهاردة مثلا المسألة زى ما بنسمع متجهة إلى الوصول إلى تنازلات وحل وسط اتفاقات وكلام زى كده.

حجازى: أنا المعلومة اللى عندى واللى أنا بشتغل عليها أوى.. المعلومة الصادقة الوحيدة اللى عندى إن إحنا فى رابعة العدوية لو حدث اقتحام للقصر هنروح القصر واللى جوه هندبحه.

أبو إسماعيل: اه اه

حجازى: ده المعلومة اللى عندى وأنا نازل معايا سلاح مرخص بتاعى سلاح حى.. وكل الناس اللى معايا بالشكل ده لكن مسألة أن يتم التنازل والتجاوز أن مرسى يسقط دى مسألة يعنى أنا شخصياً يا شيخ حازم والناس اللى معايا دونها الرقاب، ورابعة والشباب كلهم بتوع الجماعة الإسلامية وشباب كتير من الإخوان معاهم سلاح، معاهم سلاح فعلاً .

أبو إسماعيل: بس دا بيتقبض على اللى معاهم سلاح أه

حجازى: مفيش حد اتقبض عليه خالص لا لا خالص

أبو إسماعيل: بيقولو فى 17 فى الإسكندرية اتقبض عليهم من البناء والتنمية

حجازى: لا خالص خالص أنا اتصلت بالدكتور طارق الزمر مفيش حاجة كدة

أبو إسماعيل: أه أه ربك كريم يا رب العالمين

حجازى: لا إحنا عايزينك يا شيخ حازم يعنى أنا كمان.. يعنى أنت قابلت الريس فى اللقاء بتاع بالليل ده

أبو إسماعيل: " لالالا، الحقيقة بس إنه واضح أن الموضوع متجه إلى حد ما إنه بالضغوط اللى أصبحت موجودة دى إنه هيحصل تنازلات، أنت عارف حضرتك يتطلب الأمر وضوح الرؤية وأنا بالنسبة لى حتى الآن وجود التغير الذى لا نعرف إيه هو بالضبط، تغير زى إيه، لا يعنى يحصل مثلا ضغط على الريس فيقعد معاهم ويحصل تنازل ما أو اتفاق ما معرفش إيه هو.. يشيلو الوزارة مثلاً يشيلو مش عارف النائب العام .. معرفش إيه ويجيبوا حمدين صباحى".

حجازى: لا لا أنا لا أظن الكلام ده حصل وحتى لو حصل تغيير الحكومة.. لا أظن مسألة البرادعى ولا حمدين ولا الكلام ده صعب أوى

أبو إسماعيل: هو مش لازم الاتنين دول بالذات ممكن يقوم عبد الفتاح السيسى يشكل الحكومة مثلا

حجازى: لا أنا معنديش أخبار من ديه خالص كل ده.. كلام بيتقال لكن معنديش أى أخبار فيها، الأخبار اللى عندى أن مسألة إسقاط الرئيس ولا تنازله ولا دعوته لانتخابات مبكرة ولا الكلام ده ده غير مقبول إطلاقا وغير مطروح إطلاقاً.. مسألة إقالة النائب العام برضو غير مقبولة وغير مطروحة.. الحاجة الوحيدة اللى ممكن أن تطرح هى تغيير الحكومة.. وده مطلبنا كلنا من الأول لكن مسألة إن البرادعى ييجى رئيس حكومة ده برضو مسألة مش مش مطروحة.. مش مطروحة خالص.. يعنى ديه تحديداً أنا اتكلمت فيها مع الرئيس.. قالى مستحيل

أبو إسماعيل: طيب استمرار المظاهرات اللى فى المحافظات ديه يا دكتور يعنى حضرتك شايف إنها مش مكملة ولا إيه يعنى.