وجه مواطن مصرى مقيم بالسعودية يدعى "أحمد" رسالة شديدة الهجة إلى النائبة غادة عجمى، التى أطلقت مبادرة طالبت فيها المصريين بالخارج بتحويل 200 دولار للبنوك المصرية، قائلا: " بالنسبة للأبله هبه عادل ولا غادة عادل.. معرفش هى مين أصلا وشغالة إيه اللى بتتكلم فى موضوع الـ 200 دولار.. أقولها إحنا مطحونين وطالع عنين أبونا فى السعودية، وأنتى جايه تتكلمى عننا على التلفزيون عشان نحول فلوس".
وأضاف المواطن فى فيديو بثه على موقع "يوتيوب" قائلا :"إحنا متجوزين وبندفع مصاريف سكن ومصاريف دكاترة ومطحونين وطالع عنين أبونا ف السعودية، والأبله اللى أسمها هبه عادل ولا غادة عاملين يتكلموا عننا فى التلفزيون.. سابوا كل الدنيا وبصوا على المغتربين.. المغتبرين اللى طالعين عنين أبوهم، ومحرومين من عيالنا وأهلنا، وطالع عنين ابونا من الفجر لنص الليل، ومش بناخد حقنا كامل، ولا بناخد حقوقنا وانتو فى الاخر بتبصوا علينا من اليمه التانيه وتقولوا 200 دولار".
وتابع :" إحنا هنا شغالين بندفع سكن فى السعودية، وبندفع إيجار وميه وأكل وشرب وبنبعت فلوس لأهلنا فلوس فى البلد والعيشة مش مكفية عشان الأبله اللى أسمها غادة عادل تقعد تتكلم علينا.. يعنى سابوا الدنيا كلها وجم على المغتبرين؟!".
واستطرد قائلا: "بردوا اللى معاه سيارة وعايز ينزل بيها مصر يدفعونا تمنها مرتين.. طب سبونا ننزل بالسيارة.. جاملونا عشان نجاملكم، أدونى حقى عشان أديكم حقكم.. ده الفلبينى هنا اللى مش مسلم موجود فى السعودية بياخد حقه تالت ومتلت.. سفير بلده بيجيب حقه، وحطين فى حسابه بالبنك 50 ألف دولار عشان لو كفيله زعله بياخد فلوس، وإحنا هنا محدش معبرنا ولا حد بيسأل فينا اللى محبوس واللى مرمى فى مستشفى واللى كفيله ضربه، واللى دهسته سيارة فى الرياض ومحدش جاب حقه.. حد اتكلم من السفراء؟! حد اتحرك؟! السفير قال الطبيب الشرعى أثبت أنه اندهاس بالعربية! طيب ما إحنا عرفين والناس كلها شافت ده.. المفروض من اتلف شيئا فعليه اصلاحه فين حقه؟!.. كما تدين تدان".
وتابع :"سبونا فى حالنا إحنا انصابنا بكل الامراض من العيشه هنا ونومه على الارض.. كل واحد بيطبخ لنفسه ويغسل لنفسه وسايب عياله وأهله عشان لقمة العيش".
كانت النائبة غادة عجمى، عضو مجلس النواب عن المصريين فى الخارج، أطلقت حملة لدعم الاقتصادى، فى الآونة الأخيرة، مطالبة المصريين المغتربين بتحويل 200 دولار لأسرهم الموجودين فى مصر على وجه السرعة، من أجل ضخ مبالغ بالدولار فى البنوك المصرية.
كما طالبت النائبة غادة عجمى، بـإرسال كل مغترب لها وصل تحويل قيمة الأموال حتى تستطيع أن تقول "هما دول المصريين فى الشدائد وفى حبهم لبلدهم.. أتعشم فيكم لا تخذلونى مصر تناديكم".
