كتب محمد رضا
أجرى
المستشار مرتضى منصور، عضو مجلس النواب عن دائرة مركز ومدينة ميت غمر بمحافظة الدقهلية، ورئيس نادى الزمالك، حوارًا مع صحيفة نيويورك تايمز الأمريكية، أكد خلاله أن الرئيس الأسبق محمد حسنى مبارك، اتصل به للترافع عنه، قائلا: "كنت ممكن آخد منه 40 مليون جنيه علشان أترافع عنه، لأن أنا اللى رشحت فريد الديب ليه، وحسنى مبارك عمرى ما شوفته ولا قعدت معاه فى حياتى إلا لما كان بيجى مجلس الشعب من عامى 2002 و2005 بيفتتح الدورة البرلمانية، رغم أن أيمن نور "الخائن" –حسب تعبيره- قعد معاه وعنده كتاب كاتب فيه مقالات بيقول فيها أن حسنى مبارك راجل عظيم، وأعظم رئيس فى التاريخ، إنما الفلوس بتغير النفوس".
وأضاف عضو مجلس النواب عن دائرة مركز ومدينة ميت غمر، خلال الحوار، "أنا أول واحد قال يسقط النظام، ولما الناس كانت بتستخبى تحت السراير كنت بهتف والكل يردد ورايا، وقضية حل الحزب الوطنى، أنا اللى رفعتها وكسبتها، وأول واحد كلمه مبارك علشان يكون المحامى بتاعه هو أنا، وكنت ممكن أدافع عنه مقابل ملايين لكنى رفضت، و25 يناير أنا تنبأت بيها، لكن مكنتش بتنبأ بـ 25 يناير أنها تكون من "فيس بوك"، أو أنهم يهدوا الشرطة وبعدها يهدوا الدولة المصرية".
وعن اتهامه فى موقعة الجمل، قال: "بالعقل والمنطق هذا النظام ظلمنى وحبسنى وزور الانتخابات ضدى وزور انتخابات النادى ضدى، يعنى مش عاوزنى على المستوى السياسى والرياضى، ازاى أنا هجيب ناس أساعده فى موقعة الجمل".
