أبلة فاهيتا: عجينة دخل البرلمان عشان يمنع "البوس".. وتعرض فيديو له على كرسى فتحى سرور

واصلت الدمية أبلة فاهيتا سخريتها من مجلس النواب، وخصت فى حلقة أمس بالسخرية النائب إلهامى عجينة حيث قالت، باركولى طلعت من أهم القضايا اللى هيتكلم فيها مجلس الشعب، هيتقدم ضدى استجواب يا حبايبى سابو كل اللى أحنا فيه دا وهيتقدم ضدى استجواب أرملة هزت عرش مصر، قال إيه فى نائب مقموص من أغنية الحلقة اللى فاتت.

وعرضت الأبلة فى حلقتها من برنامج "فى الدوبلكس" المذاع على قناة سى بى سى إكسترا الفضائية، تقريرا عن النائب إلهامى عجينة جاء كالآتى "عجينة يتصدى لأخطر قضايا الوطن النائب عجينة يطالب بمنع البوس، ويظهر النائب فى إحدى المداخلات التليفونية يقول التحام وجوه الرجال فى بعضها البعض يسبب عدوى وانتقال لبعض الأمراض الجلدية، وطلب رسمى لمنع البوس بين الرجال، وفيديو يوضح النائب يصرخ ويقول لا لا لا أنا أعرف إن الواحد يبوس مراته أو ابنه أو بنته أما أنا أبوس فى الناس كلها ليه؟! والناس تبوس فيا ليه يعنى؟! مما يصيب الإعلامية لميس الحديدى بضحك هستيرى.

وواصلت فاهيتا فى تقريرها "مشغول بأعقد الملفات مستعينة بفيديو للإعلامى يوسف الحسينى 89 نائبة خدوا قرار إن هم يعملوا قصف جبهة لإلهامى عجينة بعد مطالبته نائبات البرلمان بارتداء ملابس محتشمة، والنائب أنا ضد الكجولة لإن هيبة المكان تخلينا نلبسله الزى اللى يليق بيه".

وتظهر الأبلة فى تقريرها الإعلامى نصر القفاص يقول النائب دا كان عايز يشتغل فى البروتوكول أو يشتغل إستايلست أو حاجة زى كده، وتصفه بصاحب التاريخ البرلمانى المشرف، النائب ليه واقعة شهيرة وهى دخوله القاعة والجلوس على كرسى فتحى سرور، وتظهر إحدى النائبات تقول إن النائب عجينة لديه شهوة للظهور الإعلامى.

وتضيف فاهيتا قائلة "لأ يا حبيبى فعلا النائب عجينة دخل البرلمان عشان يمنع البوس والكجولة ويستجوب أبلة فاهيتا دا إيه الفيلم الكوميدى اللى إحنا عايشين فيه دا وحتى مش مضحك".