شرح تفصيلى لنظام انتخابات برلمان مصر 2015
أيام قليلة وندخل أجواء الانتخابات الفعلية، ونقف طوابير قدام لجان التصويت منتظرين دورنا فى الانتخاب، لكن رغم كده فيه ناس كتيرة ممكن تكون لسه مش عارفة بعض المعلومات والحاجات المهمة عن الانتخابات، وغايبة عنها كتير من التفاصيل، فلو كنت منهم، عايز تفهم نظام الانتخاب فى مجلس النواب الجاى؟ اقرا المقال ده، لأنه مهم للغاية، وبعد ما تقرا وتفهم، اعمل خير وانشره علشان كل الناس تعرف .
هاحاول أبسّط الموضوع خالص، طلّع ورقة وقلم واكتب ورايا، بسم الله الرحمن الرحيم ..
"مجلس النواب" الجاى – هوّ اسمه كده فى الدستور، مجلس النواب، مش مجلس الشعب زى زمان، وطبعًا مجلس الشورى اتلغى خلاص – ومجلس النواب مكوّن من 567 عضو متوزعين بالطريقة دى:
448 عضو هيتم انتخابهم فردى
120 عضو هيتم انتخابهم قوائم
27 عضو يعيّنهم رئيس الجمهورية
مصر تم تقسيمها لـ 205 دايرة للفردى، لانتخاب الـ 448 نائب، فيه دواير هيتم فيها انتخاب عضو واحد، ودواير هيتم انتخاب عضوين، ودواير 3 أعضاء، وده حسب كثافة السكان فى كل دايرة.
مثال: محافظة الإسكندرية اتقسّمت لـ 14 دايرة لانتخاب 25 نائب فردى، والدواير هى:
المنتزه أول "3 نواب"، والمنتزه تانى "نائبين"، والرمل أول "نائبين"، والرمل تانى "نائبين"، وسيدى جابر "نائبين"، وباب شرقى "نائبين"، ومحرّم بك "نائبين"، ومينا البصل "نائبين"، والدخيلة "نائبين"، والعامرية "نائبين"، وكرموز نائب واحد، والعطارين نائب واحد، والجمرك نائب واحد وبرج العرب "نائب واحد".
زى نموذج الإسكندرية كده كل محافظة ليها توزيعة خاصة، باختلاف عدد النواب الفردى من محافظة للتانية حسب عدد السكان، ولكن النقطة المهمة فى الموضوع إن الفردى فردى، مفيش حاجة اسمها واحد فئات وواحد عمال زى زمان .
مصر اتقسمت لـ 4 دواير كبار لانتخاب 120 نائب بالقوائم، دايرتين منهم هيتم انتخاب 15 نائب لكل واحدة، ودايرتين لانتخاب 45 نائب لكل واحدة، ويبقى المجموع 45 + 45 + 15 + 15 = 120 نائب,
الدايرة الأولى "45 نائب"، وتشمل القاهرة والقليوبية والدقهلية والمنوفية والغربية وكفر الشيخ، يعنى الحزب أو التحالف هينزل المحافظات دى كلها بنفس القائمة كدايرة واحدة، مش ينزل فى كل محافظة منهم بقائمة، والتصويت هيتم على نفس القائمة اللى فيها 45 اسم فى كل المحافظات دى.
الدايرة التانية "45 نائب"، وتشمل الجيزة والفيوم وبنى سويف والمنيا وأسيوط والوادى الجديد وسوهاج وقنا والأقصر وأسوان والبحر الأحمر .
الدايرة التالتة "15 نائب"، وتشمل الشرقية ودمياط وبورسعيد والإسماعيلية والسويس وشمال سيناء وجنوب سيناء .
الدائرة الرابعة "15 نائب"، وتشمل الإسكندرية والبحيرة ومرسى مطروح.
أى حزب أو تحالف هينزل بقائمة يبقى لازم يكون عدد الأسماء اللى فيها مطابق لعدد نواب الدايرة، يعنى فى الدايرتين الأولى والتانية القايمة يبقى فيها 45 اسم، والتالتة والرابعة القائمة يكون فيها 15 اسم .
ما تقلقش من كتر الأسماء، لأن حضرتك هتعلّم على اسم القائمة فى الاستمارة، مش هتعلّم على أسماء .
ده أول شرط ، العدد الإجمالى، الشرط التانى هو إن القائمة الـ 15 لازم يكون فيها 7 سيدات، أقل من كده لأ، والقائمة الـ 45 فى الدايرتين الكبار يكون فيها 21 سيدة، وبرضه أقل من كده لأ، لكن ممكن أكتر .
الشرط التالت إن فى كل قائمة لازم كل محافظة يبقى ليها عدد محدد من المرشحين، وده حدّده القانون، يعنى مثلاً القائمة اللى هتتنافس فى الدايرة الرابعة اللى ليها 15 مقعد، لازم يكون منهم 7 من إسكندرية و7 من البحيرة وواحد من مطروح، وقائمة الدايرة الأولى اللى هىّ 45 مقعد، لازم منهم 14 من القاهرة، و7 من القليوبية، و8 من الدقهلية، و5 من المنوفية، و7 من الغربية و4 من كفر الشيخ.. وهكذا.
الشرط الرابع فى القائمة إنها لازم تحتوى على فئات محددة، وبأعداد محدّدة:
* المواطنون الأقباط.. 3 أعضاء فى القائمة الـ 15، و9 فى القائمة الـ 45
* العمال والفلاحون.. عضوان فى القائمة الـ 15، و6 فى القائمة الـ 45
* الشباب تحت 35 سنة.. عضوان فى القائمة الـ 15، و6 فى القائمة الـ 45
* المصريون بالخارج.. عضو فى القائمة الـ 15، و3 أعضاء فى القائمة الـ 45
* ذوو الاحتياجات الخاصة.. عضو واحد فى القائمة الـ 15، و3 أعضاء فى القائمة الـ 45
وباقى عدد المرشحين فى القائمة متنوع، وأى حاجة.
يعنى المواطن فى إسكندرية مثلا هيستلم الاستمارة، هيختار فيها اسم او اتنين أو تلاتة من المرشحين للفردى، حسب دايرته وعدد مقاعدها، وهيختار فيها اسم للقائمة أم 15 مقعد، والقوائم اللى بيختار منها دى هىّ هىّ اللى معروضة لسكان البحيرة ومطروح، لإنهم دايرة واحدة قوائم، أما الفردى فبيختلف من دايرة لدايرة.
واضحة كده؟ تمام جدا، فاضل حاجة واحدة بس علشان الصورة تكتمل، دلوقتى لو قائمتين بيتنافسوا فى دايرة ليها 15 مقعد مثلا، وقائمة أخدت تلات أرباع الأصوات، وقائمة أخدت الربع، الـ 15 مقعد هيتقسّموا بينهم إزاى؟
الإجابة.. مش ها يتقسموا، القائمة الكسبانة هتاخد كل المقاعد الـ 15، أو الـ 45 لو فى الدايرتين الكبار، ده نظام اسمه القائمة المطلقة، المهم القائمة الكسبانة لازم تجيب لوحدها أكتر من نص عدد الأصوات، ولو ما حصلش ده بيتم إجراء إعادة بين أعلى قائمتين من القوائم المرشحة، أصلهم لو اتقسموا ما بينهم وأخدت أول 10 أسماء من الكسبانة، مع أول 5 من الخسرانة مثلاً، كده الناس اللى أسماءها فى آخر القائمتين طلعوا بره، ولو كل قائمة حطّت الشباب فى الآخر مثلا، ممكن تلاقى مفيش شباب أصلا فى البرلمان، وده غير الخناقة اللى هتحصل علشان الترتيب جوّه القائمة.
دلوقتى مفيش الكلام ده، القائمة بتمثيلها النوعى لو جابت 50% من الأصوات + 1، تدخل كلها بشبابها وعمالها ومعاقيها ومسيحييها، وده لضمان تمثيل كل الناس دى، وتخطى مشكلة وضعهم فى آخر القوائم بصورة شكلية، زى ما حزب النور عمل مع الستات كده فى انتخابات برلمان الإخوان وحطّهم فى الآخر علشان ما يدخلوش البرلمان.
