الرئيس فى "الكاتدرائية"

هنأ الرئيس عبد الفتاح السيسى، الأقباط خلال كلمته بالكاتدرائية المرقسية بالعباسية، فى الاحتفال بأعياد الميلاد المجيد، قائلا: "كل سنة وانتوا طيبين، وأنا مش عاوز أعطلكم عشان قداسة البابا مايزعلش، اسمحولى أقولكم كلمتين.. فى البداية بوجهلكم جميعا التحية والتقدير والاحترام، واسمحولى إنى أهنيكم، كل عام وأنتم بخير.. كلنا بخير".


وأضاف الرئيس السيسى، الذى زار الكاتدرائية مساء أمس الأربعاء: "السنة اللى فاتت قلنا عايزين نحب بعضنا بجد، ونحترم بعضنا بجد، يا رب نعرف نحب بعضنا بجد، وكل سنة وانتوا طيبين"، وقال ردا على الهتافات المحبة له داخل الكاتدرائية: "احنا بنحبكم جدا".


وأوصى المصريين بعدم الاختلاف أو السماح لأحد بإحداث الوقيعة بينهم، قائلا: "عاوز أوصيكم وأوصى كل المصريين بالمناسبة دى.. من فضلكم توقفوا أمام كلامى جيدا..ماحدش أبدا يقدر يفرق بينا..الموضوع دا مهم أوى، ومش أنا أعمله بس، دا نعمله كلنا، وكلنا لازم نرجع مش زى زمان، أكتر، احنا مع بعض.. يا رب يديم الحب.. عاوز أوصيكم وأوصى نفسى وأوصى كل الموجودين هنا، ما فيش حاجة تؤذينا، لا ظروف اقتصادية ولا حتى سياسية، ولا أى حاجة، أى حاجة ممكن نقدر عليها إلا إن احنا نختلف، وعاوز أقولكم إن ربنا سبحانه وتعالى سننه فى الوجود التنوع والاختلاف، مافيش حاجة واحدة غيره هو، لكن ربنا سبحانه وتعالى خلقنا مختلفين فى الأديان.. أشكال.. ألوان.. لغات.. عادات.. تقاليد.. كل حاجة".

السيسى : ماحدش قدر ولا هيقدر يخلى الناس حاجة واحدة

واستطرد: " ماحدش قدر ولا هيقدر يخلى الناس حاجة واحدة، ماحدش هيقدر ده"، مردفاً: "كل سنة وانتو طيبين.. كل سنة وانتو طيبين". وأضاف رئيس الجمهورية:" لأن احنا فى مصر، اللى علّمت البشرية على مدار آلاف السنين الحضارة، بتعلم دلوقتى وتقول للناس تعالوا.. انتو بتعملوا ايه، وبتقول للدنيا كلها، وعقبال الدنيا كلها تسمعنا، وبعدين تعرف اللى بتسمعه مننا، وبعدين تنفذ اللى عرفته مننا، وبعدها تحول لعادات وتقاليد ياخد سنين طويلة".

وتابع :"مافيش حاجة وحدة غيره هو.. لكن ربنا خلقنا مختلفين أديان وأشكال وألوان ولغات وعادات وتقاليد كل حاجة ..محدش يقدر يخلى الناس وأنا قلت الكلام ده قبل كدا.. لا أحد قدر قبل كده ولا هيقدر بعد كده يخلى الناس حاجة واحدة.. ماحدش هيقدر ده.. مش أنا بقول محدش يقدر يعمله".

السيسى : طلبت من أحد المفكرين كتاب يعلّم الناس أن الدنيا مش زى بعضها

وكشف الرئيس عن لقائه بأحد المفكرين، قائلا: "كنت بتكلم مع أحد المفكرين منذ أيام بقوله من فضلك احنا عاوزين نعمل كتاب أو كتب تعلم الناس أن الدنيا مش زى بعضها، من أول أولادنا فى المدرسة الصغيرين لحد اللى فى الجامعة، نقولهم مش زى بعضنا ونقبل ده ومش يقبلوا بس يقبلوا بحب لأن ربنا خلقنا كده.. دى وحدة".


وأكمل السيسى حديثه:"والنقطة التانية اللى عاوز أقولهالكم اننا عملنا ده علشان ندى المثل والنموذج للمحبة الحقيقة بين الناس وبعضها البعض ومافيش حاجة تألمنا وتعذبنا أبدا.. دى نقطة تانية.. تحيا مصر بيكم تحيا مصر بيكم"، واعتذر الرئيس عن تأخر ترميم الكنائس المحترقة، بقوله:" خلو بالكم احنا اتأخرنا عليكم فى ترميم وإصلاح اللى تم إحراقه اتأخرنا.. إن شاء الله السنة دى كل اللى اتأخر قداسة البابا هيكون متصلح.. واسمحولى أقولكم يا ريت تقبلوا اعتذارنا فى اللى حصل ده.. يا ريت تقبلوا اعتذارنا فى اللى حصل، إن شاء الله إن كان لينا نصيب من أهل الدنيا السنة الجاية ما يكونش فيه بيت واحد ولا كنيسة واحدة من كنائسكم إلا لما يكون رجعناها".


وتابع:"خلوا بالكم ده مش تفضل مننا.. ده حق واحنا مش هننسى أبدا ليكم ولا قداسة البابا الموقف الوطنى المشرف العظيم اللى اتعمل خلال الفترة دى.. أنا بشكرك يا قداسة البابا وبشكركم كلكم.. مرة تانية كل سنة وانتم طيبين وعيد سعيد عليكم وعيد سعيد علينا كلنا.. وإن شاء الله السنة اللى جاية تبقا خير وسلام وأمن واستقرار بينا كلنا.. وفى الآخر تحيا مصر بينا كلنا.. تحيا مصر بينا كلنا.. تحيا مصر بينا كلنا ".


وختم الرئيس كلمته، بـ" تحيا مصر تحيا مصر تحيا مصر.. تحيا بأهل مصر مش بالسيسى.. تحيا مصر بأهل مصر كلها".