مرتضى لـ"السادات": أنت تاجر مخدرات

يبدو أن المعركة لن تهدأ أبدًا بين النائب مرتضى منصور، والنائب محمد أنور عصمت السادات، والتى بدأت على خلفية تصريحات قالها منصور ضد السادات خلال لقائه بقناة العاصمة مع النائب سعيد حساسين، ما دفع السادات إلى تقديم شكوى إلى رئيس مجلس النواب الدكتور على عبد العال ضد منصور يتهمه فيها بالإساءة إلى زملائه من النواب.

وفى تطور جديد للأزمة بين الطرفين نشر النائب مرتضى منصور على صفحته بموقع التواصل الاجتماعى "فيس بوك"، فيديو له يشن فيه هجومًا حادًا على النائب محمد أنور عصمت السادات، ويتهمه بأنه يتاجر فى المخدرات والأراضى، وأنه سيقدم بلاغًا ضده للنائب العام.

مرتضى منصور ينشر فيديو يتهم فيه محمد أنور السادات بالاتجار فى الأراضى والمخدرات

وجاء فى نص الفيديو الذى نشره النائب مرتضى منصور على صفحته موجهًا كلامه للنائب محمد أنور عصمت السادات: "أنت اشتكيتنى لرئيس مجلس النواب، هو أنا كشفتك فى البرلمان، أنا عايزك لو أنت راجل من ضهر راجل تروح تعمل بلاغ للنائب العام".


وتابع منصور متهما السادات بالحصول على الأراضى والاتجار فى المخدرات: "شوف الأرض اللى أنت أخدتها بملايين الجنيهات من إبراهيم سليمان وبعتها لرامى لكح، أنت مصيت دم المصريين".

وأضاف "أنت نسيت لما أنا كنت وكيل نيابة، وأنت ووالدك متهمين، وأحمد شمس خفاجة قال إن المخدرات كنتوا بتجيبوها فى الخشب، وقال أنتوا أفسدتوا الحياة السياسية.. هو أنت نسيت أنا كنت وكيل نيابة فى القضية.. ومنستش الكلام ده".

واستطرد النائب مرتضى منصور: "أنت بتقول إنى أنا موجوع عشان أنت كنت ضد ابنى، أنا مايشرفنيش أن واحد تاجر مخدرات والمحكمة هى اللى قالت مش أنا اللى قلت.. يقف جنب أحمد.. أحمد أشرف منك ومن عمرو الشوبكى".

وتابع منصور معلنا أنه سيتقدم ضد النائب محمد أنور السادات ببلاغ للنائب العام قائلا: "خلى بالك إحنا معندناش حد بيتاجر فى الآثار.. ولا الأراضى.. ومعندناش حد... 3 مليون يورو عشان يروح يشتم السيسى فى ألمانيا.. وأنا هطلب تحريات الأمن الوطنى والمخابرات.. ولو كلمة أنا قلتها عليك كذب فى حوارى مع سعيد حساسين اعملى بلاغ للنائب العام".

مرتضى منصور لمحمد فايق: أنت أشكالك مكانهم السجن يا متآمر

وقال "أنا بقى اللى هعملك بلاغ للنائب العام.. وعشان تعرف إنك متراقب أنت اجتمعت يوم السبت مع محمد فايق المتآمر، مش عارف إزاى ده رئيس المجلس القومى لحقوق الإنسان، يا محمد أنت ناسى إنك دخلت السجن عشان مؤامرة ضد عمك.. هو كان متآمر على أنور السادات اللى متبرى منكوا قبل وفاته".

وأضاف منصور كاشفا فى الفيديو الذى يذيعه عن اجتماع للنائب السادات مع رئيس المجلس القومى لحقوق الإنسان لتحذيره من رئاسة مرتضى منصور للجنة حقوق الإنسان بالبرلمان، قائلا: "أنت اجتمعت مع محمد فايق ودكتور حلمى نبيل فى مصر الجديدة فى مكتبة سوزان مبارك، وكان معاك عاطف مخاليف وهالة أبو السعد عشان تعملوا مؤامرة فى لجنة حقوق الإنسان وقلت للمجلس القومى إزاى ده هيجى رئيس لجنة حقوق إنسان ده هيفضحنا".

وأضاف منصور: "محمد فايق أشكالك أنت فى السجن أنت متآمر وصدر ضدك حكم إنك متآمر ضد الدولة".

وقال "ميرفت جاويش مسحت بكرامتكو الأرض وقالتلكو مرتضى منصور أشرف منكو"، "محمد أنا هعملك بلاغ للنائب العام عن التمويل الأجنبى.. عن الأرض اللى أخدتها.. عن الفنادق اللى فى الغردقة وشرم الشيخ والكبريهات المفتوحة وجمعية السادات اللى بتتمحك فيه وكان ميشرفوش أن انتوا من العيلة".

منصور لفايق: يا محمد يا فايق مكانك فى مزبلة التاريخ

ووجه منصور خلال كلمته بالفيديو الذى نشره على صفحته اتهامات للنائب السادات قائلا "محمد احترم نفسك بس أقولك إيه أموال كلها فساد مخدرات وآثار.. مش أنا اللى قلت دى المحكمة وأنت كنت فى المحكمة.. مش أنا شفتك فى المحكمة فى القفص.. العيب مش فيك العيب إن الدولة طلعت أشكالك من الواحد اللى طلعتهم تانى.. ولا هتجيب ناس تخطفنى زى ما بتوع الآثار خطفوا البت وطلبوا فدية وطلعت كلها آثار فى آثار".

وتابع: "ها وأنت يا محمد يا فايق أنت مكانك فى مزبلة التاريخ واللى عينك رئيس مجلس قومى لحقوق الإنسان.. إزاى دا أنت تآمرت على الدولة وتآمرت على مين رأس الدولة على مين بقى.. على البطل الزعيم أنور السادات عمك يا محمد.. عمك يا محمد..".

وواصل منصور هجومه على النائب محمد أنور السادات قائلا: "بدل ما عمال تتنطط ما تروح تاخد تار عمك يا أخى ما تروح تاخد تاره مش أنت عنتر عمال تتنطط يمين وشمال مع الاحترام طبعا لعفت وزين دول ناس محترمين خالص طلعهم من الموضوع دول ولاد مؤدبين روح خد تار عمك يا محمد مش أنت راجل فلاح وتعرف التار وأنت عارف مين قتل عمك والتار بيمد لسابع ها اه.. يا محمد يا قومى يا حقوق إنسان.... يا بتاع أنت ياللى اسمك فايق.. بلاش أنا ده انتوا مكشوفين ومفضوحين..".

منصور للسادات: أنت عايز لجنة حقوق الإنسان عشان التمويل.. خلاص الحنفية اتقفلت

وتابع "شوف حتى الاجتماع السرى اللى انتوا عملتوه حتى قلت لكم ميرفت جاويش مسحت بكرامتكم الأرض ست بميت راجل.. وبعدين مش مفروض المجلس القومى لحقوق الإنسان ملوش علاقة بلجنة حقوق الإنسان.. أنت مالك مهرى عايزها ليه بالعافية.. ليه عشان التمويل... الحنفية اتقفلت.. ورحمة السادات العظيم اللى أنا بحبه وبعشقه اللى ابنه ومراته عملوا بيان إنهم ميعرفوكش وتبرأوا منك.. ورحمة أمى والسادات المحترم أنا اللى أعملك بكرة بلاغ للنائب العام عن التمويل اللى خدته عشان تعمل أكاديمية الشباب عشان تشتم وتقل أدبك على البلد.. 3 مليون يورو مرة.. 250 مليون.. ألف يورو مرة.. ولسه فى اجتماعات مع السفير الألمانى.. أنت لو راجل تكذب اللى أنا قلته بس اللى أنا قلته يا محمد موثق ومش مرتضى يقول أى كلام أنا بقى اللى رايح للنائب العام وبعدين أنا فضحتك قدام مصر كلها إيه علاقة دكتور على عبدالعال هو الكلام ده البرلمان هو الدكتور على عبدالعال هيجيب الخرزانه ويضربنى على رجليا لا أنت انتهى العهد ده.. بقولك لا فوق.. أنا اللى رايح للنائب العام لو حرف من اللى أنا قلته والاجتماع بتاع اليساريين ومطعم السمك والسفارة الألمانية طلع فيه كلمة كذب أو غلط أتحداكم.. إنما يا مفضوح يا مكشوف...".