مرتضى: "اتحاد الكرة جه بالتزوير"

فتح النائب البرلمانى مرتضى منصور رئيس نادى الزمالك، النار من جديد على مجلس إدارة اتحاد الكرة، متهمًا جمال علام رئيس الاتحاد بـ"الفشل" فى كل المنتخبات، ووعده قائلًا: "فريق الزمالك مش هيروح برج العرب ورحمة أمى يا جمال يا علام ما أنا رايح برج العرب.. انسى"، وعلى الرغم من أن القضاء سيحكم بمدى قانونية نتيجة انتخابات اتحاد الكرة يوم 28 فبراير الجارى، إلا أن منصور حسم الأمر "أنا كلامى واضح اتحاد الكرة ده جى بالتزوير".





وكان من المفلت تكرار مرتضى منصور لعدد من الكلمات والعبارات أكثر من مرة، وهى كالتالى: قال: "إن شاء الله" 7 مرات، وهى من المرات النادرة التى يستخدم فيها هذه العبارة فى أحاديثه، كما قال "والله العظيم" مرة واحدة، بينما قال "الحمدلله" مرتان، والغريب نطقه باسم النادى الأهلى 16 مرة، بينما اسم نادى الزمالك 9 مرات فقط، وذكر اسم استاد برج العرب 11 مرة، بينما استاد بتروسبورت 13 مرة، فى حين 5 مرات فقط لاسم استاد الدفاع الجوى، ونطق كلمة "باشا" مرتين، واسم جمال علام مرتين، وحلف مرة واحدة قائلا: "مش هيروح برج العرب ورحمة أُمى يا جمال يا علام"، ونطق كلمة "انسى" مرتين، ونطق كلمة "تزوير" 3 مرات.

وإلى نص كلمة مرتضى منصور:-

"اجتمعنا مع اللعيبة من غير الجهاز لأن للأسف طبعا تم إبلاغ اللعيبة بعد ما مشيوا وجه حوالى 12 لاعبا انهاردة فاحنا اجلنا الاجتماع برضو مع اللعيبة من غير الجهاز بكرة الساعة 5 برضو أن شاء الله .. عشان نشوف.. هما معندهومش مشاكل .. المستحقات واخدينها الحمدلله والنسبة بتاعت المشاركة واخدينها الحمدلله.. ودى مباراة وعدت المهم الماتش اللى جاى ماتش الاهلى.. مش عشان الأهلى بس عشان 3 بونط.. أن شاء الله ربنا يوفقهم ويبقى فرق بونط.. فى اى ماتش جى تتعوض انما لا قدر الله لو حصل أى فقد يبقى 7 بونط هيبقى كتير وهيبقى لينا وقفه أن شاء الله.





بالنسبة انت لسه بتقولى أن اتحاد الكرة طلع بيان.. أنا كلامى واضح اتحاد الكورة ده جى بالتزوير .. جى بالتزوير.. والقضية محجوزة للحكم فى انهم جم بالتزوير يوم 28 أن شاء الله.. اتفضل إدارة شؤون المسابقات 22/12/2015 إلى السيد المدير التنفيذى .. اعتبارا من الأسبوع الـ13 حتى الأسبوع كذا.. يسرنا أن إلى السيد الرئيس والسادة االعضاء .. تحيات والكلام ده.. ترسل صورة إلى لجنة الحكام والشرطة والعلاقات العامة والتليفزيون واستاد بتروسبورت والدفاع الجوى .. السويس .. اسكندرية .. الفيوم.. برج العرب.. تمام .. الجدول ده أنا ماشى به من أول يوم ماتش الأهلى والزمالك يوم التلات 9/2/2016.. الأهلى والزمالك فين فى بتروسبورت الساعة كام سبعة.. لو السما انطبقت على الأرض مش هروح برج العرب لو السما انبطقت على الأرض مش هروح برج العرب يا جمال علام.. انت عايز تبقى رئيس اتحاد كورة بامارة ايه فشلك فى كل المنتخبات ياراجل أنت والاتحاد واللى معاك ده انا كلامى واضح انا يوم التلات أن شاء الله موافق 9/2 من الساعة 5 فريقى فى استاد بتروسبورت .. النادى الأهلى مجاش هروح اعمل محضر.. يبقى مين اللى غلط ومين اللى صح.. انا بسالك يبقى مين اللى غلط ومين اللى صح.. ("حضرتك ماشى على الجدول" رد مصور الفيديو).. ولا هو حسب المزاج ولا انت بتنقى طب السنة اللى فاتت الأهلى قال مش هلعب فى الجونة وقلت له حاضر يا باشا روح برج العرب ولا محصلش؟! ("حصل" رد مصور الفيديو).. خلاص.. ومكنش ايه .. كان ملعب ومش برج العرب مع ذلك أنا رضخت.. كان ملعبه الجونة .. انا مش بعمل تحدى ولا عند .. انا داخل بطبق اللايحه اهى بتقول ايه .. انت باعت لى جواب بتقول ايه؟ (بتروسبورت" رد مصور الفيديو).. هاتلى سبب انى ملعبش فى بتروسبورت.. سبب واحد.. هاتلى سبب.. طب العب فى الدفاع الجوى.. هتقولى الجيش ممانع هقولك الجيش موافق.. والدليل على كدهان برج العرب اسمه ملعب الجيش .. فانا راجل صح.. تانى لو السما انطبقت على الأرض .. وإلا المجلس كله هيمشى .. مجلس الإدارة بالكامل.. واحنا قاعدين زى ما أنت شايفنا كلنا قاعدين اهو .. محدش هيلوى دراع نادى الزمالك.. محدش هيفرض إرادة غلط.. وانا كنت بكلم السيد وزير الشباب.. عايزين تلغوا الدمج يتقال الكلام ده قبل ماتش امبارح .. عشان متقولش مرتضى عايز يبوظ .. افتكروا من أول يوم انا قلت ايه .. انا ملتزم بايه؟ .. ("بالجدول" رد مصور الفيديو).. بالجدول بيقولى ايه؟ بتروسبورت.. هروح بتروسبورت .. حضرتك مش عاجبك بتروسبورت .. الأهلى ليك ملعبين تانيين يختارهم الدفاع الجوى واستاد القاهرة .. أى ملعب فى التلاته اللى الأهلى اختارهم من أول المسابقة انا تحت أمرك.. أى ملعب .. هو ليه بيقولك اختار 3؟ .. عشان الظروف إذا ماتحتش الأمنية أو هنا يبقى عندك حرية الاختيار مظبوط؟.. الأهلى اختار تلاته وأنا اخترت تلاته.. اخترت بتروسبورت .. الدفاع الجوى.. استاد القاهرة.. نفس الملاعب اللى اختارها النادى الأهلى لكن انهاردة تقعد تدوخنى أنا والاندية عشان الأهلى ملوش مزاج يلعب فى بتروسبورت أروح ادفع 800 ألف جنيه كل مرة معسكرات .. وأسوان تيجى الناس بتوع أسوان وإسكندرية .. وعاشن الأهلى ليه مزاج يلعب هناك فى برج العرب عشان الجماعة العرب اللى هناك بيحبوه واخد بالك وكلهم أهلاوية والفريق زى ما حصل المرة اللى فاتت لما روحنا برج العرب واتشتمت هناك.. لا أنا آسف انا هلعب فى الاستاد اللى أنت حددته أو الاستادين التانيين اللى انت قلت عليهم .. شوف بقى انا مش هتعامل واقولك لازم تروح وتلعب فى بتروسبورت اللى انت كنت متعقد منه ما أنت كسبت فيه إمبارح تمام.. انت اخترت دفاع جوى أو بترو أو استاد القاهرة .. أنا هلعب فى ستاد دفاع جوى.. فريق الزمالك مش هيروح برج العرب ورحمة امى يا جمال يا علام ما انا رايح برج العرب إنسى.. إنسى.. عايز تبوظ الدورى بوظه .. معنديش مشكلة إنما متكسرش ارادة نادى محترم ..



النادى الأهلى مع احترامى ليه اختار خلاص وما دام اختار انا ملتزم وإلا الماتش اللى جى بين الزمالك والأهلى يجيلى ورقة كده مكتوبة احطه فى المكان اللى يعجبنى .. هروح ألعب فى اليمن .. هلعب فى اليمن .. مش أى حد عايز يختار بقى كده بقت بالكييف .. هروح ألعب فى اليمن .. لعبونى فى اليمن.. لاعبنى فى ليبيا لاعبنى فى العراق لاعبنى فى سوريا عند داعش .. مش هيمشى الكلام ده انا ملتزم .. خد الجدول ده خليه معاك .. أنا قلت ابعت لى الجواب رسمي.. أنا اللى بعت الجواب ده ولا أنت اللى باعته؟ الاتحاد هو اللى بعته.. انا ملتزم باللى جى فى اتحاد الكورة .. وهما لو عندهم راجل يطلع يقول النادى الأهلى اختار أندية ايه؟ .. لو عندهم راجل؟ .. بس هو فين اتحاد الكورة.. هانى ريدة راح مع المنتخب يلاعب اليمن ويلاعب ليبيا ويتغلب من الأردن .. سيف استقال.. أحمد مجاهد عمال يغنى على الأطلال وعمال يلف على المحافظات عشان الانتخابات.. والله العظيم يا جماعة أى نادى ينتخب هذه المجموعة يبقى يستحق اللى يحصل له ويستحق يتقال عليه اللى اتقال أنه اخد كيلو كباب و5 آلاف جنيه مين أحمد مجاهد ده اللى يمثلكوا؟ مين ده أنا عايز أعرف مين ده؟ .. مش ده اللى كان موقوف قبل كده سنة عشان ضرب حكم لما كان رئيس لجنة بتاع ده نادى بيلا مش بيلا مش عارف اسمه ايه نادى الحامول وموقوف سنة ده يبقى بيمثل اندية مصر؟ ده كومبارس ده!.. عيب.. آخر كلمة الزمالك مش هيلعب فى برج العرب .. الزمالك .. مش فتونه .. الزمالك ملتزم بالجدول اللى ادتهولك .. الزمالك هيروح الملعب اللى انت محدده .. قدامك حلين ياما تقولىطب أنا عندى استاد القاهرة والدفاع الجوى اللى الأهلى اختارهم .. أقولك تحت امرك يا باشا رايح ..خلاص.. إنما الأهلى اختار برج العرب فى التلاته.. لا.. يبقى مش هروح.



(سؤال:التصعيد هيبقى عن طريق استقالة أو الانسحاب من الدورى) .. يا بيه احنا مش هنلعب يا بيه احنا رايحين كلنا على استاد بتروسبورت اللى جالى الجدول به.. اتحاد الكورة اللى عمال يبعت بيانات .. هقول تانى لاتحاد الكورة لامؤاخذة الميه مقطوعة عندى فى العمارة والكلنيكس غالى باخد البيانات دى بتستعملها فى التواليت واشد السيفون بس مبلاقيش ميه فبرميها فى التواليت.. بلاش قرف.. بكرة إن شاء الله اجتماع اللعيبة إن شاء الله .. اتفضلوا".