السيسى: مفيش مصرية هتهرب فى مركب

أدى الرئيس عبد الفتاح السيسى، صلاة الجمعة اليوم، مع شباب الصحفيين والإعلاميين، أثناء جولته لتفقد عددًا من المشروعات بمنطقة جبل الجلالة على طريق الزعفرانة- العين السخنة، وأجرى الرئيس حوارًا مع عدد من الشباب المتواجدين بالمنطقة، وهم مجموعة من الصحفيين والإعلاميين والكتاب ضمن البرنامج الرئاسى لتأهيل الشباب للقيادة.



وقال الرئيس عبد الفتاح السيسى: "إننا نطلق اليوم مشروعات ليس الهدف منها دغدغة مشاعر المصريين ولكن بهدف استدعائهم لبلدهم".

وأضاف السيسى خلال تفقده عددًا من المشروعات صباح اليوم بمنطقة جبل الجلالة: "ياريت نعمر بلدنا هنا"، موجها رسالة للشباب، قائلا: "إحنا بنبى بلدنا وهنبنيها.. وبكرة يا مصريين تشوفوا بعنيكم.. أنتم مشوفتوش دولة بصحيح لحد الآن.. بكرة تشوفوا بعنيكم الدولة بحق".

السيسى للمصريين: "قررت كل أسبوع أزور مشروع علشان تعرفوا اللى بيحصل فى البلد"

وقال الرئيس السيسى، إنه قرر كل أسبوع زيارة مشروع من المشروعات التى يتم تنفيذها على أرض الواقع حتى يعلم المصريون أننا نعمل فى صمت ضاربا المثل بما يحدث فى البلد: "هناك أب يجرى على أولاده ويجبلهم كل حاجة وتيجى زوجته تقوله إيه اللى أنت جايبه ده وهو ده اللى بيحصل دلوقتى".

وأضاف "السيسى" لشباب الإعلاميين والصحفيين قائلا: "إحنا مكملين ومعنوياتنا مش هتقل وهقلها لنفسى وليكم إحنا شعب مقاتل وعمرنا سبعة آلاف سنة".

السيسى: "فى شباب بيطلعوا فى التليفزيون يتكلموا بغطرسة لكسر الرموز الوطنية"

وأوضح الرئيس السيسى، إن هناك عددا من الشباب يظهرون الآن فى القنوات الفضائية، ويتحدثون بغطرسة لمحاولة كسر الرموز الوطنية.



وأضاف: "خدوا بالكم اليومين دول تلاقى شباب بيطلعوا فى التليفزيون ويتكلموا بغطرسة ويكسروا الرموز ويترتب عليها كسرنا اجتماعيا، وده طريق لكسر الدولة ومش هيحصل، وأن الأسرة المصرية محترمة وشقيانه وبتجرى على أكل عيشها".

السيسى: المصريين رجاله ومفيش ست مصرية هتركب مركب زى سوريا

قال الرئيس عبد الفتاح السيسى: "إن المصريين رجاله، ومستعدين أنهم يموتوا لو أى حد فكر يمس مصر"، مشددا: "مش هنوصل إن الست المصرية تركب مركب زى سوريا وغيرها".

وأضاف السيسى خلال جولته بجبل الجلالة برفقة عدد من شباب الإعلاميين والصحفيين: "أنا بنوركم بحلف بالله أنا بنقلكم الواقع علشان تشوفوا الحفر اللى قدامكم خلو بالكم".

السيسى: "أنا مش قلقان من بره ولا ميه زى بره ولكن قلقان من جوه"

وقال الرئيس السيسى خلال تفقده لمشروعات جبل الجلالة: "أنا مش قلقان من بره ولا ميه زى بره ولكن قلقان من جوه وقلقان من اللى بيتخططلنا وأنا عارفه وقلته قبل كده ويجب التصدى له".

وأضاف السيسى خلال حديثه لشباب الإعلاميين والصحفيين خلال تفقده مشروعات جبل الجلالة: "عنوانى هو الإصلاح والبناء وهحافظ على الشعب".