لازم الوزراء يتقشفوا.. نائبة للحكومة: "بلاش تغرقونا فى ديون القروض والمواطن يدفع ضرائب"

قالت ثريا الشيخ عضو لجنة الشئون الاقتصادية بمجلس النواب، إن الحكومة ليس لديها خطة واضحة المعالم لسد القروض، قائلة: "مش عارفة هتسد القروض إزاى وعماله تاخد ما شاء الله كتير".

وأضافت النائبة ثريا الشيخ، فى تصريح لـ"برلمانى"، أن "الحكومة بتجيب فلوس زى الفل ومش مديانة أمل فى بكرة، ومش بتصارحنا هتسددها فى كام سنة، 5 ولا 10 سنين، ما أحنا لازم نعرف وبلاش تغرقونا وتغطسونا فى الديون وبعدين تاخدوا من المواطن ضرائب، مش ناقصة قرف بقى حرام كده، لازم الحكومة يبقى عندها رؤية مستقبلية ولازم الوزراء يتقشفوا ويقللوا البذخ".

وتساءلت: "يعنى أيه وزير يبقى عنده 3 أو 4 عربيات وبيسافر هنا وهناك على نفقة الدولة وفى النهاية مش بنستفيد من سفرياته غير أن الشعب بيدفع تمنها من جيبه، أحنا عايزين حكومة واعية فاهمة بتعمل أيه وتقولنا عندى خطة هعمل فيها واحد واتنين وتلاتة".