أحدث افيهات ابله فاهيتا عن البرلمان ..اغنية ساخرة "النواب قفشوا الكراسى"

كعادتها سخرت أبلة فاهيتا من النواب فى برنامجها "من الدوبلكس"، فبدأت بالسخرية بما وصفته بتزويغ النواب من المجلس، وتظهر الحلقة فيديو للنائب مصطفى بكرى وهو يحاول الخروج من القاعة، والدكتور على عبد العال يوجه له الكلام "اجلس فى مكانك".

وواصلت "فاهيتا" فى برنامجها المذاع على قناة "سى بى سى "، أمس الخميس، سخريتها من مجلس النواب قائلة: "مجلس النواب بيقول مفيش حساب واحنا مفيش حد يلحقنا وعلى رأى المثل جبتك يا برلمان تحاسبنى لقيتك يا برلمان مش عايز حساب".



وقدمت أغنية على لحن أغنية "دقوا الشماسى" للفنان عبد الحليم حافظ تقول كلماتها:
"نزلنا شاركنا فى الانتخابات .. فى الانتخابات .. منهم لله ناس اختاروا غلط .. غلط وجابولنا عاهات .. جابولنا عاهات .. شفنا العك فى أول جلسة .. فمنعوا البث فى الجلسات .. ترى بت ترى بت تت تات .. احنا السادة النواب .. ترى بت ترى بت تت تات ..مش عايزين أى حساب .. فتحت الجلسة .. إوعوا تعارضوا عيب عيب .. ماتستدعوشى .. وماتناقشوشى .. خلو المركب تمشى وننجز .. ماتفتوشى .. ما تعارضوشى .. إوعوا تعارضوا أى حكومة أى حكومة أى حكومة .. ولو شايفين الناس مظلومة .. إوعوا تحاسبوا وزير فى حكومة .. أنا هعمل سبوبة من المجلس دى فلوسه جنان .. دى فلوسه جنان .. ويا سلام لو تلغوا ضرايبنا تبقى أحلى كمان ..تبقى أحلى كمان .. قدامنا قوانين مالهاش عد .. الوزرا ياعينى مظلومة بجد ..مش عايزين يجوا ويسأل حد .. يقولوا وزير مع نايب شد .. هنطبطب ونظبط .. مشاكل ليه على الفاضى؟ خلونا نعمل إحنا النادى .. أيوة النايب محتاج نادى .. ونقضيها نوم ده العادى .. مسكوا الكراسى .. قفشوا الكراسى .. قفشوا فى كراسى البرلمان .. دفوا الكراسى .. بنشوف مآسى .. هنشوف مآسى .. هرى بتنجان أى خناقات .. هنشوف مآسى .. يلا يلا ودونى مراسى .. إهدوا إهدوا .. صدعتوا راسى .. نواب بتضرب بالجزم .. مش بالبونيه .. قاعدين يعدوا فى القرانين زى ما هى .. فى خمس أيام كروتوا لينا ييجى 300.. ياحبايبى نفسهم فى باركينج للعربية .. عايزين الأجرة بالساعة مش باليومية .. والتانية بتلم الفلوس رحلة مراسى قفشوا فى كراسى البرلمان .. قفشوا الكراسى .. لو كنت ناسى .. لو كنت ناسى .. إتحل قبلك قد إيه .. شكلك كده ناسى .. لموا الكراسى .. يلا يلا لموا الكراسى هوبا هوبا صدعتوا راسى".