بالفيديو.. نائب لوزير التعليم: "أنا مش جاى أشكرك ولازم تمشى لأنك أحبطت 600 ألف طالب"

قال محمد الحسينى، عضو مجلس النواب عن دائرة بولاق الدكرور بمحافظة الجيزة، إن وزير التربية والتعليم الدكتور الهلالى الشربينى متخصص فى الاستراتيجية والسياسات، وهو رجل أكاديمى ومتخصص "يعنى لو قعدنا قدامه نتعلم" يشرح كل شىء وإحنا نتعلم منه لكنه بيقول مصطلحات أحنا مش فاهمينها أساسا".

وأضاف "الحسينى" خلال اجتماع لجنة التعليم بوزير التعليم الدكتور الهلالى الشربينى اليوم السبت أن الوزير راح رتب مع كل الجهات المعنية "الله ينور" 100 – 100 وصور مصطلحات علشان يطمن على المدرسين ولم يطمن على الطلبة وحمامات الطلبة داخل المدارس "العيال بتعانى فى المدارس".

وأوضح أن وزير التربية والتعليم بتاع الاستراتيجية والسياسات معندوش سياسة لمواجهة الحريق داخل المدارس يا معالى الوزير عندك 56000 مدرسة فيها خزانات وهمية، ولو سألتك عنها مش هتعرف ترد عليا فيها، الشارع يغلى من اللى حصل فى الامتحانات، والناس بتعيط أمام المدارس أنا مش جاى أشكر الوزير ومعملش اللى عليه وحط تحتها ميت شرطة.

واستكمل "الحسينى" حديثه، "أن أبسط قواعد الإنسانية حمام ومروحة، وشباك وديسك أنا ما شفتش الوزير اتكلم عليهم، ما يهموش المواطن الغلبان فى حاجة هو عايز الشكل العام، أنا قدمت واحد اثنين ثلاثة أربعة، نزل وكيلة وزارة ولا مسئول دخل الحمام على اللى عنده السكر، بلاش الثلاثى والرباعى ده علشان أنا مش فاهمه، فى عيال عندها السكر بيخش يروح على الحمام.

تسريب الامتحان والاستراتيجيات والسياسيات، والعمل والكمبيوتر، أمريكا فيها أحدث الأجهزة والتطور ما بيحصلش فيها الكلام ده، أنا مش عايز حد يرد عليا إلا رئيس اللجنة، اللى جاى يقول كلمة للوزير ويشكره أنا ماليش دعوة بيه.

وتابع "الحسينى"، انا جاى أدافع عن ناس انتخبتنى وقالت لى وصل للوزير أنت صدرت الإحباط للناس كلها، أنت عندك 600 ألف طالب صدرتهم وللأسر كلها الإحباط، عندك 1581 لجنة عندك غش جماعى عينى عينك ما اتكلمتش عليه، وأنت بتقول أنا فحصت الناس اللى داخلة، بمناسبة الفحص والجهات المعنية، مش الجهات دى بردو اللى فحصت مستشار وزير الصحة الى طلع مرتشى، مش عايزين نتكلم بمصطلحات وهمية، انا عايز اقول مشاكلى أيه هحل ايه وهطلع من الورطة اللى إحنا فيها بكرة نعمل ايه، ايه اللى احنا نحله بكرة، عندى اقتراحات الوزير يمشى.