أهالى "العجوزة": "هاردلك أحمد مرتضى.. وحكم المحكمة لازم يتنفذ ومبروك عليك يا شوبكى"

قضت محكمة النقض، بعدم قبول التظلم المقدم من النائب أحمد مرتضى منصور، على حكم بطلان عضويته بمجلس النواب، وتصعيد الدكتور عمرو الشوبكى نائبا لدائرة الدقى والعجوزة بمحافظة الجيزة.



وتوجهت كاميرا "برلمانى" إلى دئرة العجوزة لترصد آراء أهالى الدائرة عن ذلك القرار فالتقينا بأحمد محمد حيث قال: "مش فارقة معايا مين بدل مين المهم يكون النائب بتاعى موجود فى الشارع يتابع الناس ويشوف مشاكلهم".

وقال محمد حسن من أهالى دائرة العجوزة: "النائب أحمد مرتضى كويس، وعملنا المجارى واشتغل رغم الفترة الصغيرة اللى مسك الدائرة فيها"، أما محمد محمود فقال: "النائب عمرو الشوبكى بنتشرف بيه كلنا وإن شاء الله ربنا يوفقه كده أفضل والحق حق".

فيما قال إسماعيل سعيد من دائرة العجوزة: "أحمد مرتضى لسه محدش شاف منه حاجة عشان نقدر نحكم عليه خصوصاً أن الفترة صغيرة جداً، هو نزل وأعد مع الناس والشهادة لله عمل خدمات هنا، لكن عمرو الشوبكى كان نزل على خفيف وبقوله ربنا يوفقه ويوفق كل واحد يعمل خير للبلد ويكون قلبه على البلد"، فيما قال أحمد حافظ "ربنا يولى من يصلح".

وقال مواطن آخر من نفس دائرة العجوزة: "حكم المحكمة لازم يتنفذ ويحترم، وقبل كده أحمد مرتضى قال أنا هنفذ حكم القضاء يبقى لازم ينفذه، وبقول للشوبكى ربنا يوفقه".

كما وجه أحمد عبد الله يعمل "ميكانيكى" رسالة لكل من النائين: "أحمد مرتضى هاردلك وإن شاء الله المرة الجاية تكون أحسن، وللشوبكى مبروك عليك بس شوف الناس وخلى بالك منهم".

وكانت قد قضت محكمة النقض بعدم قبول التظلم المقدم من النائب أحمد مرتضى منصور، على حكم بطلان عضويته بمجلس النواب، وحكمت بصحة عضوية الدكتور عمرو الشوبكى بمجلس النواب للمقعد الفردى، دائرة الدقى والعجوزة بمحافظة الجيزة، وألزمت المطعون ضده بدفع المصروفات و200 جنيه أتعاب المحاماة".