كتب برلمانى
واصلت الدمية أبلة فاهيتا سخريتها من مجلس النواب، وخصت فى حلقة أمس بالسخرية النائب إلهامى عجينة، حيث قالت: "باركولى طلعت من أهم القضايا اللى هيتكلم فيها مجلس الشعب، هيتقدم ضدى استجواب يا حبايبى سابو كل اللى أحنا فيه دا وهيتقدم ضدى استجواب أرملة هزت عرش مصر، قال إيه فى نائب مقموص من أغنية الحلقة اللى فاتت".
وعرضت الأبلة فى حلقتها من برنامج "فى الدوبلكس" المذاع على قناة سى بى سى إكسترا الفضائية، تقريرا عن النائب إلهامى عجينة جاء كالآتى "عجينة يتصدى لأخطر قضايا الوطن النائب عجينة يطالب بمنع البوس، ويظهر النائب فى إحدى المداخلات التليفونية يقول التحام وجوه الرجال فى بعضها البعض يسبب عدوى وانتقال لبعض الأمراض الجلدية، وطلب رسمى لمنع البوس بين الرجال، وفيديو يوضح النائب يصرخ ويقول لا لا لا أنا أعرف أن الواحد يبوس مراته أو ابنه أو بنته أما أنا أبوس فى الناس كلها ليه؟! والناس تبوس فيا ليه يعنى؟! مما يصيب الإعلامية لميس الحديدى بضحك هستيرى.
قال النائب إلهامى عجينة عضو مجلس النواب، عضو مجلس النواب المستقل بمحافظة الدقهلية، أن برنامج فى الدوبلكس برنامج جميل، وفاهيتا بتسخر منى عشان بتغير بعد ما طلبت تتجوزنى وأنا رفضت وعشان كده بتهاجمنى.
وأضاف عضو مجلس النواب المستقل بمحافظة الدقهلية، فى تصريحات خاصة لـ"برلمانى" اليوم الجمعة، أن برنامج فى الدوبلكس ساخر ينتقد المجلس والنواب بأسلوب فكاهى، مضيفا، فاهيتا بتنتقد نفسها ومش زعلان منها وردى على سخريتها إنها بتغير منى وأنا لسه بفكر لو هتدفع مهر كويس هتجوزها لازم اسخر منها زى ما بتسخر منى.
