تموت الحرة ولا تأخذ «اللبن المدعم» بثدييها
أحيانا يتفوق الواقع على الخيال، لكن دائما ما تتفوق الحكومة على الواقع والخيال معا، وبعد الهرى والهرى المضاد فى موضوع ألبان الأطفال المدعمة خرج علينا وزير الصحة بعبقرية جديدة من عبقرياته: «فحص ثدى السيدات اللاتى يرغبن فى الحصول على لبن الأطفال، أحد الشروط الأساسية لصرف حليب الأطفال المُدعم»، والله الواحد مش عارف يقول إيه؟!.. الفلوس «سترة» فعلا، معاك فلوس روح اشترى لبن من أبو 70 جنيه، ممعاكش فلوس ابعت المدام «تكشف» وترجع لك باللبن، وهى دى مصر.
الحكومة هتأجر الأهرامات
المفروض أن الاعتراف بالفشل هو أول طريق النجاح، لكن فجأة قررت وزارة السياحة الاعتراف بفشلها فى إدارة وتطوير الأهرامات، طب الحمد لله، نطور بقى، لأ، إزاى؟ وزارة السياحة قررت تشيل إيديها وتأجر الأهرامات لشركة تتولى مهام الإدارة والتطوير وجمع الفلوس، بعد التعاقد مع شركة للقيام بأعمال النظافة، وشركة أخرى للقيام بأعمال التأمين، طب جميل، وبالمرة نقعد الحكومة فى البيت، ونتعاقد مع شركة لإدارة الدولة، بدل مرتبات الوزرا اللى ع الفاضى.
