دعنا نكتب اليوم بشكل مختلف، حتى يبدو الأمر أبسط من تعقيداتهم.. دعنا نكتبها بالعامية المصرية لعلهم يفهمون، ما دام بعضهم أصبح يعتبر اللغة العربية الفصحى «شتيمة» تنال من صاحبها.. فاهمنى أنت طبعا!! إياكم والنافخون فى النار.. إياكم والناس اللى لما تغلط تجرى تبعد العيون عن غلطها بتوليع حريقة فى حتة تانية.. إياكم والناس اللى مش شايفة فى الدنيا غير نفسها وغير مصلحتها.. مش بس دول.
إياكم والناس اللى بتلبس المشاكل توب غير توبها، الناس اللى قدرتها على تكييف المشاكل كارثية، اللى بتخلى من مشكلة صغيرة معركة كبيرة، اللى هم يحبوا يتفلسفوا ويعملوا فيها أهل الوطنية والكرامة والشهامة ويلبسوك فى حيطة لمجرد أنه نفسه يسمعك وأنت بتسقف له على هتافاته الحنجورية عن مصر والوطن والكلام الكبير ده.. احذروهم فهم العدو.. بل هم أخطر من العدو.
فى اليومين دول موجة غريبة بيعملها ناس عمالة من امبارح تروج إلى أن جماهير الكورة معندهاش وطنية، الناس اللى كل تحليلها ورؤيتها للمناوشات اللى بين الجماهير والنكت والإفيهات والسخرية أنها مؤامرة لضرب مصر، أنها دليل على عدم الانتماء.. إيه علاقة مشجع كورة متعصب أو متحمس بالوطنية والانتماء؟! ليه بتدخلوا الموضوعات فى بعض؟ ليه عاوزين تسخنوا الجماهير على بعض؟ ليه بتزرعوا فى قلوبهم الغضب؟ ليه عاوزينا نروح تانى لدم جديد زى ما حصل فى الدفاع الجوى أو بورسعيد؟! - من وإحنا صغيرين من أيام الأبيض والأسود وإحنا متعودين وعايشين على أن مناوشات جماهير الأهلى والزمالك موجودة، جزء من تكوين المجتمع ده ومن تفاصيل حياته.. يخسر الأهلى جمهور الزمالك يبدأ شماتة وسخرية من جماهير الأهلى.. يخسر الزمالك جمهور الأهلى يبدأ الشماتة وحفلات الغيظ والسخرية من جمهور الزمالك.. بيبقوا أخوات وأزواج وعايشين تحت سقف بيت واحد والماتش يخلص من هنا والكسبان يبدأ يحتفل على الخسران.. ارجع لكل أفلام الأبيض والأسود هتلاقى نصها على الأقل مليان مشاهد عن مناوشات وسخرية جماهير الأهلى والزمالك من بعضها.. هتلاقيها كلها فيها قهوة اسمها الأهلاوية قصادها قهوة اسمها الزملكاوية والاتنين بينكتوا على بعض.. ولا عمرنا سمعنا وقتها حد بيقول إن ده معناه تدمير لمصر ولا معناه إن مافيش انتماء ولا معناه قلة وطنية.
- نفس الحكاية لو بتابع الدوريات الأوربية هتلاقى جماهير برشلونة بتفرح وتنكت على هزائم ريال مدريد الداخلية والخارجية وجماهير الأرسنال وتوتنهام، نفس الحكاية فى إنجلترا وجماهير الإنتر وميلان واليوفى نفس الحكاية.. جماهير كورة.. هم كده متعصبين.. متحمسين بيكرهوا المنافسين بيحبوهم يسخروا.. بيحبوا يسخروا منهم.. ولا عمرنا سمعنا برضه إن حد بيقول لجماهير برشلونة اللى بتفرح بخسارة ريال مدريد دورى الأبطال إنهم بيكرهوا إسبانيا أو مش وطنيين.. مين بقى اللى طلع النغمة دى عندنا؟! ليه فى كتاب وسياسيين ورياضيين عمالين يولولوا ومولوعينها نار بسبب سخرية جماهير الأهلى من هزيمة الزمالك من النجم الساحلى بخمسة أهداف؟! ولسه ناس فى الناحية التانية ولولوا وولعوها تعصب لما جمهور الزمالك عمل حفلة شماتة وغيظ بعد هزيمة الأهلى فى الكأس من الزمالك وبعد هزيمته من أورلاندو الجنوب الأفريقى.. مين قالكم إن سخرية الجماهير خطر ونار وضد الوطنية.. دى طبيعة الجماهير.. طيب لو إفيهات الجماهير بالنسبة لكم معناها غياب الوطنية وضياع الانتماء ونشر التعصب.. طيب مسمعناش حضراتكم ليه فى برامجكم وصحفكم ومقالاتكم الرياضية بتقولوا للناس إن تصريحاتكم وتحيزكم هى كمان بتضيع الانتماء والوطنية وبتولع نار التعصب.. ولا اللى بيعمله خالد الغندور وشوبير وشادى محمد ومدحت شلبى وغيرهم حلال لكن اللى بيعمله الجمهور حرام؟!..
مسمعناش حضراتكم ليه بتقولوا إن تصريحات رئيس نادى الزمالك ضد الأهلى ومجلس إدارته أو اللى بيعمله علاء عبد الصادق بيضيع الوطنية وبينشر التعصب! أبوس إيديكم سيبوا الجماهير فى حالها بلاش تستغلوها فى خناقتكم، سيبوهم يقولوا نكت ويسخروا ويحتفلوا ويغيظوا بعض.. لأن المناوشات دى هى روح الكورة..
لكن لما بيتدخل أصحاب المصالح فى البرامج الرياضية وفى مجالس الإدارات بتقلب تعصب ودم.
