من الطبيعى أن تطل نافذة منزلك على مناظر طبيعية وبيئة صحية خالية من التلوث تصلح أن تعيش فيه أنت وأسرتك وهذا ما يتمناه سكان بولاق الدكرور الذين تطل نوافذ منازلهم على ترعة ممتلئة بالقمامة ويستنشقون الروائح الكريهة وشوارعهم مليئة بالحفر التى تركها لهم عمال المجارى.
قال أحد السكان لكاميرا"برلمانى " ويدعى رمضان عبد الله :"الزبالة دى بقالها كتير وماحدش بيسأل هنا خالص ..ماحدش بيسأل عن بولاق الدكرور خالص وكأنها مش على الخريطة واللى إحنا فيه ده وقف حال إزاى الواحد يقدر يفتح محله قدام حاجة زى كده فين الحكومة بتاعتنا وفين الحى والنواب كمان مبيسألوش فينا ومياه الصرف ضاربة وبنتحايل على عامل المجارى أنه يسلك البلاعة مش عايز يسلكها وسابها مفتوحة ومشى إحنا عايزين ننضف فين النضافة والحضارة هنا ".
أضاف أحد المواطنين يدعى محمود :" إحنا عندنا مشكلة صرف صحى ومشكلة زبالة والبيوت جوا بتبقى عايمة فى المجارى والكلام ده من زمان مش من دلوقتى والأيام دى فحتوا حفر وقالوا عشان المترو ومعملوش حاجة والحاجات دى لمت نموس وجابت أمراض ".
قال رجل مسن وأحد سكان المنطقة يدعى سيد الشيخ :"مفيش حد بيسأل عننا والريحة والأمراض منتشرة هنا وفيه ناس عيانة عندها القلب تعيش إزاى كده وإحنا بينا وبين شارع السودان سكة الحديد لكن فرق كبير بينا وبينهم شوفوا المهندسين والدقى عاملة إزاى وإحنا عاملين إزاى ".
