بالفيديو.. رسالة من سواق "توك توك" تقلب الـ"سوشيال ميديا" وتبكى الجميع على حال مصر

فى موقف مؤثر وحزين وفى ظل تردى الأوضاع المعيشية والاقتصادية الصعبة فاجأ أحد سائقى "التوك توك"، الإعلامى عمرو الليثى بإجابات صادمة وحزينة عندما بادر الإعلامى بسؤاله "وأنت بتشتكى من إيه"، فرد السائق قائلاً: "بالله عليك أنا هسألك سؤال واحد بس دولة فيها برلمان وفيها مؤسسات داخلية وخارجية وبها ما يزيد عن 20 وزارة حالها يبقى بالوضع ده والشكل ده إزاى".

واستطرد سائق التوك توك قائلاً: "قبل إجراء الانتخابات الرئاسية كان لدينا سكر وأرز يكفينا وبنصدره .. إيه اللى حصل لما نتفرج على التليفزيون نشوف مصر فينا وننزل الشارع نلاقيها بنت عم الصومال بالله عليك قلى إيه اللى حصل وإيه الحل، الناس اللى رايحين يحتفلوا وجابوا 38 وفدا صرفوا عليهم 25 مليون جنيه والمواطن الفقير مش لاقى كيلو الرز فى الشارع ..هل ده يرضى ربنا".

واستنكر المواطن، الإنفاق الذى تقوم به الدولة على المشروعات الكبرى فى مقابل عدم إنفاقها على العملية التعليمية فى البلاد، وتابع: "الناس اللى فى التليفزيون اللى بتقول مصر بتنهض وبنصرف الفلوس على المشروعات القومية والتعليم أسفل مما نتخيل ..إزاى يبقى عندى مواطن جعان ومش متعلم وصحته على كده واعمل ليه مشاريع قومية زى دى أكيد هيدخلنى بيها فى الحيطة".
وشدد سائق التوك توك، على أنه حال اهتمام الدولة بالعملية التعليمة والصحية والزراعية فى البلاد سوف تنتج مواطن لا يستطيع أحد كسره أو التغلب عليه، وتابع: "والله لو عملنا الحاجات التلاتة دول المصرى ما هيقدر عليه غير ربنا".

واسترجع سائق التوك توك، مصر منذ 100 عام ماضية عندما جاء اليابنيون كى يدرسوا النهضة المصرية ليطبقوها فى بلادهم، وتابع: "بالله عليك دى مصر .. حرام مصر يتعمل فيها كدا ..مصر كانت مسلفة بريطانيا تانى أكبر دولة فى العالم ..مصر اللى عملت أطول وأول خط سكة حديد فى العالم ..مصر اللى كان الاحتياطى النقدى بتاعها أكبر احتياطى نقدى فى العالم يحصل فيها كدا".

وختم المواطن المصرى حديثه مع الإعلامى عمرو الليثى قائلاً: "مفيش حد قلبه على مصر ولا بيحبها يقول لا حرام شوية تجار ضحكوا على الناس بحجة الوطنية والديمقراطية والعدالة الاجتماعية وعملهم بعيد كل البعد عن هذه الشعارات..والله حرام ولا يرضى ربنا".