الرئيس السيسى يشهد افتتاح مشروعات جديدة فى قطاع الكهرباء جنوب البلاد.. ويؤكد: "إحنا لسه فى أسبوع الصعيد وبكرة فيه افتتاحات جديدة"

** الرئيس السيسي: خلوا الناس تشوف الإنجازات.. كل مشروع يضاهى سد عالى على الأقل

** الرئيس السيسي يشكر وزير الكهرباء: "عالم فاضل جليل حقق نقلة فى القطاع"

** الرئيس السيسي: قطاع الكهرباء شهد ظروفا صعبة قبل البدء فى تطويره

** الرئيس السيسي: "كل المشروعات الجديدة بيشتغل فيها شباب الصعيد"

شهد الرئيس عبد الفتاح السيسي، افتتاح عدد من المشروعات الجديدة التابعة لقطاع الكهرباء في محافظات الصعيد، منها مراكز التحكم ومحطات جديدة"محطة محولات إسنا الجديدة"، ومركز التحكم في نجع حمادى، وغيرها.

وأجرى الرئيس جولة تفقدية داخل مجمع بنبان للطاقة الشمسية، واستمع خلاله لشرح تفصيلي عن عمل هذا المجمع الضخم، حيث يعد أضخم محطة لتوليد الكهرباء من الطاقة الشمسية على مستوى العالم، وتم إنشاؤه بالشراكة مع القطاع الخاص والخبرات الدولية المتخصصة، كما يعد أحد أهم مشاريع البنية التحتية في مصر لتوليد الكهرباء من الطاقة الجديدة والمتجددة.

وأضاف الرئيس السيسي، خلال افتتاح مشروعات جديدة في قطاع الكهرباء: "مش كل مرة في الافتتاحات بنتكلم عن اللى اتعمل وبكام وكده.. إحنا النهاردة بنتكلم عن عالم جليل فاضل في التخصص.. ومن خلال جهده وعلمه يقدر يحقق نقلة في موضوع الكهرباء في مصر".

وأكد الرئيس عبد الفتاح السيسى، أن قطاع الكهرباء شهد ظروفا صعبة في الدولة المصرية قبل البدء في تطويره بشكل كامل، متابعا: "قطاع الكهرباء في كل شيء كان صعبا جدا وفي موضوع الطاقة.. وماشيين في الطاقة ومش اقصد على الكهرباء بس.. إحنا لما اتكملنا عاوزين مصر فيما يخص الطاقة الكهربائية سواء إنتاج أو توزيع أو تحكم زيها زى أي دولة متقدمة جدا في المجال". 

وقال الرئيس السيسى: "نقدر نعمل ربط كهربائى مع دول الجوار نقدر.. ظروفنا في 2013 و2014 قبل كده مكنش هنقدر.. العالم رايح لكده.. الدولة اللى مش هتكون جاهزة هيفوتها الربط الكهربائى وده لمصلحة البشر والشعوب.. لازم يكون عندك ربط وتتبادل والاستفادة المتبادلة في الكهرباء.. والإجراءات والجهود في هذا المجال.. لازم يكون قطاع الطاقة أو الكهرباء من أرقى ما يمكن.. بوجه التحية والتقدير إلى الدكتور شاكر ووزارة الكهرباء. 

وتابع الرئيس السيسي: "دكتور شاكر له مكتب وشركة كبيرة.. "مكتب شاكر".. ساب الشركة دى ولم يسمح لها بالدخول مع الدولة والحكومة والقوات المسلحة.. ليه يا دكتور شاكر.. آى حاجة بيعملها بدون مقابل.. وانا حابب الحكاية دى".

وقال الرئيس عبدالفتاح السيسي، إن الاستثمارات في الصعيد خلال الفترة الماضية تخطت تريليون و100 مليار جنيه، مضيفا: "الأرقام اللى اتحطت للصعيد فوق التريليون جنيه و100 مليار جنيه فى الكام سنة دول ولسه شغالين".

وأوضح الرئيس السيسي، خلال افتتاح محطة بنبان للطاقة الشمسية، أن عرض أسبوع الصعيد هدفه أن نقول للناس الاهتمام مش كلام.. حد من كام يوم بيقولى رقم كام، رقم إيه؟.. ده اللى بيتحط أديك رقم صغير وأسيبك كده لا كهرباء ولا مياه ولا صرف صحي ولا طرق ايه ده؟.

وتابع الرئيس السيسي: "الإعلام مهم جدا إنه ياخد البيانات وإذا كان محتاج يبسطها بالتنسيق مع وزارة الكهرباء ميجراش علشان في النهاية الناس تجد الخدمة بالشكل المناسب".

وقال الرئيس عبد الفتاح السيسي، إن مشروع حياة كريمة في محافظات الصعيد يضم أكثر من 30 مركزا، متابعا: "معرفشى اللى هقوله مناسب.. هل ممكن العدادات اللى هنعملهم في مراكز حياة كريمة.. الـ 34 مركزا تكون العدادات مسبوقة الدفع.. لما اعمل خليت المواطن شايف الاستهلاك.. فيه ناس اشتكيت أن القراءة مش مضبوطة.. العداد معاك وانت اللى بتشحنه بدون قراءة.. انت تنظم استخدامك للكهرباء". 

وواصل الرئيس السيسي، خلال كلمته في افتتاح مشروعات جديدة في قطاع الكهرباء بمحافظات الصعيد: "لو نقدر نعمله ياريت عدادتنا في الدولة المصرية تكون مسبوقة الدفع.. علشان مشكلة الشكاوى من القراءات.. لو ده ممكن يبقى نعملها.. مش هطول أكثر من كده.. بشكرك يا دكتور شاكر.. ولسه إحنا فى أسبوع الصعيد وهنكمل بكرة".

وعلق الرئيس عبد الفتاح السيسي على مشكلة الكهرباء التي شهدتها البلاد في 2014، :"أعباء المشاريع ضخمة جدا على الدولة والديون، إحنا كنا قدام خيارين نقول الموضوع ده ميتحلش، فيه دول بقالها 15 و20 سنة في الكهرباء ومحلتهاش.

وأضاف الرئيس السيسي، خلال افتتاح محطة بنبان للطاقة الشمسية:"إحنا نحلها لأننا كنا شايفين إن الأمن القومى في مصر ممكن يتأثر جدا بالحكاية دي، ثم إن إحنا نبقا دولة ذات شأن وننمى أنفسنا وندي فرصة للقطاع الخاص والاستثمارات والصناعة إنها تنمو أو تستقر على الأقل لأن لو مفيش كهرباء الناس مش هتشتغل، وبالتالي المصانع هتتقل وقلت الكلام ده للدكتور شاكر".

وأكد الرئيس عبد الفتاح السيسي، أن الدولة المصرية تواصل العمل في تنفيذ العديد من المشروعات الكبرى في مختلف المجالات، قائلآ: "لأهالى الصعيد لازم نشوف حجم الجهد المبذول وده مش "من" من الدولة.. ده شغلنا وبنعمله ولو مش عملنها يبقى مقصرين.. وهنعمل أكثر كده.. وإمبارح كنا في توشكى.. والزملاء اللى كانوا معانا أول مرة يدخلوا يشوفوا". 

وأكمل الرئيس السيسى: "خلوا الناس تشوف توشكى وشرق العوينات وغيرها.. لانى بيكون فيه تشكيك فيما تنفذه الدولة من مشروعات.. خليهم يبنوا الأمل.. كل مشروع ده سد عالى على الأقل.. عاوز الناس تشوف علشان المعنويات ترتفع والثقة تزيد بأن الدولة قادرة تأخذ وتحسن وضعها وتبقى في مستويات أفضل.

وعلق الرئيس عبدالفتاح السيسي، على عرض الدكتور محمد شاكر وزير الكهرباء لإنجازات القطاع خلال السنوات الماضية، مضيفا: "كانت المشكلة في 2014 إن إحنا ننتج كهرباء بس؟.. لأ .. ننتج وننقل ونخلى جودة توزيعها عالية، علشان نعمل ده اتكلف تريليون و 58 مليار جنيه بدون تكاليف مشروعات حياة كريمة ..الرقم ده لما أتحط ، كتير مننا قال هل كان مطلوب مننا ؟ هل كان فيه خيار تاني ؟ ..لأ، مشيرا إلى أن الخطة العاجلة للكهرباء تكلفت 2 مليار دولار".

وأضاف الرئيس السيسي، خلال افتتاح محطة بنبان للطاقة الشمسية: "المحاضرة دي والتقديم بتاع الدكتور شاكر موجودة على موقع وزارة الكهرباء، وتفاصيل أكتر من كده، والبيانات دي مهم انها توصل للناس، سواء الورقي والتليفزيون والراديو نتكلم عن الموضوع ده علشان الناس تعرف الحكاية ماشية إزاي.

وقال الرئيس السيسي: "لما باتكلم مع الناس يقولوا الكهرباء غالية علينا ، صحيح ، هي غالية لكن مش عاوزين نغليها عليكم".. أحب كل واحد ياخد حقه، أنا وفرت لك خدمة، ..حوكمة إجراءاتنا اللى احنا بنعمله نستهدف منه تحصيل ولا لأ؟ لو مش بنحصله هايبقى فيه عجز مش هتقدر الدولة تتحمله..دولة ذات شأن وننمى انفسنا وندي فرصة للقطاع الخاص والصناعة إنها تنمو وتستقر، ولو مفيش كهرباء المصانع هتقفل مصانعها والعمالة هاتبقى بره والبلد دي هتتهد".

وأكد الرئيس عبد الفتاح السيسي، أن المشروعات الجديدة التي يتم تنفيذها فى محافظات الصعيد يعمل فيها شباب الصعيد، قائلا: "المحطة الجديدة بتاعت الطاقة الشمسية بيشغلها القطاع الخاص.. وأهل الصعيد أولى للشغل فيها". 

وأضاف الرئيس السيسي، خلال كلمته في افتتاح مشروعات جديدة في قطاع الكهرباء بالصعيد: "خلوا الناس تشوف المحطات.. الطايرة ماشية فوق المحطة 5 دقائق.. دى حاجة عظيمة.. نوفر فرصة لشباب الجامعات والمدارس لو أمكن يشوفوا الكلام ده.. والأمور في البلاد تتجه للأفضل".

وتابع الرئيس السيسي موجها الحديث إلى الدكتور محمد شاكر، وزير الكهرباء، قائلآ: "يا دكتور شاكر بتقدم الشكر وزارة الدفاع وتدق معاهم في الفلوس".. ليرد عليه وزير الكهرباء قائلا: "تحت أمرك سيادتك.. بس أنا عندى الفلوس حاجة والشغل حاجة تانية.. وتحت أمرك سيادتك".