النائبة أميرة العادلى عن تدخينها بمدرجات مصر والكاميرون: "أنا حرة"

ردت النائبة أميرة العادلى، عضو مجلس النواب، على الصورة المنتشرة لها عبر مواقع التواصل الاجتماعى بالمدرجات خلال المباراة الأخيرة للمنتخب المصرى أمام المنتخب الكاميرونى، ضمن منافسات كأس الأمم الأفريقية بالعاصمة الكاميرونية ياوندى.

وكتبت النائبة البرلمانية، عبر صفحتها الشخصية فيس بوك: "طيب عشان نخلص من القصة والرسايل الكتيرة.. أيوة دى صورتى.. ومش مضايقة ولا مهتمة بالموضوع.. أنا بشرب سجاير ومن سنين ومش مخبيه ده أصلا.. ومش هابطل السجاير وأكون إنسان جديد عشان أنا بحب أدخن.. عادة صحية سيئة بس بحبها.. زى اللى بيحب الأكل الدسم كده بيتخن وغلط على الصحة بس بيحبه".

 

واستطردت: "ببساطة مواطن مصرى زملكاوى بيشجع كورة من الطفولة وبيحضر ماتشات فريقه ومنتخب بلده ديما فى الدرجة التالتة مش المقصورة ولا الدرجة الأولى.. بيفرح ويعيط ويتعصب ويزعق ويطنط ويهتف ويغنى وبياكل ويشرب ويدخن سجاير عادى جدا.. معلوماتى إن علب السجاير مكتوب عليها لا تباع لأقل من 18 سنة.. بغض النظر عن نوعه أو شغلنته أو ديانته.. نعم التدخين ضار جدا بالصحة ومانصحش حد يدخن.. غير كده.. أنا بدخن وبحب أدخن.. وأنا حرة فى عالم حر.. نشجع منتخبنا يوم الأحد وإن شاء الله الأبطال يرجعوا بالتامنة ويفرحوا مصر كلها".