"الوكيل" لـ"برلمانى": "مبحبش الفراخ ولا بستوردها ولا بربيها ومليش علاقة بقرار الحكومة"

قال أحمد الوكيل رئيس الاتحاد العام للغرف التجارية، إنه تعجب من ذكر أعضاء مجلس النواب، اسمه فى أزمة قرار رئيس مجلس الوزراء المهندس شريف إسماعيل، بإعفاء استيراد الدواجن لمدة 6 أشهر من الجمارك، مضيفًا فى تصريحات لـ"برلمانى": "إسأل البرلمان هو اللى طلع الكلام ده، أنا شايف السادة الأجلاء الأعضاء بيقولوا إن عندهم معلومات خاصة وإنى بجيب دواجن وحاجات ومش عارف منين، وبيقولوا إنى كسبت مليار جنيه بعد قرار الحكومة".

وأوضح الوكيل، أنه لا يعمل فى استيراد الدواجن، مضيفًا "يمكن شركاتى بقالها منذ عامى 2010 -2011 لم تستورد دجاجة واحدة وليس لدى مزارع دواجن كمان أنا مبحبش أكل فراخ".

وطالب رئيس الاتحاد العام للغرف التجارية، بأن يتوجه أعضاء مجلس النواب إلى مصلحة الجمارك وهيئة الرقابة على الصادرات والواردات وهيئة الموانئ، قائلا: "البلد فيها بيانات فى الجمارك وهيئة الرقابة على الصادرات والموانئ يجيبوا البيانات ويشوفوا أنا استوردت إيه وبكام بدل الكلام اللى مش دقيق"، وتساءل: "ولا عندى موانئ خاصة كمان؟".
ورفض أحمد الوكيل، الهجوم الموجه للاتحاد، قائلا: "إحنا هيئة عامة وهيئة محترمة وعيب إن البرلمان يطلع منه الكلام ده، والاتحاد الغرف اللى أنا بمثله يضم 4.3 مليون تاجر وإحنا 70% من الناتج المحلى القومى وناسنا بتشغل 20 مليون واحد فى مصر".