كتب محمد مجدى السيسى
وجه النائب عماد محروس عضو لجنة النقل بالبرلمان، كلمة حادة لوزير النقل، رافضاً خلالها توقيع أى زيادة على سعر تذكرة المترو، قائلاً بغضب: "بلاش تقف مع الحكومة فى مواجهة الغلابة، لابد من إقالة المسئولين عن إدارة المترو، ووضع استراتيجية بمعرفة سيادتك لإعادة التطوير، الناس مش متحملة، والحكومة ماشية بمعيار ادبحوا الناس ومحدش هيقدر يتكلم".
وتابع "محروس" فى كلمته خلال اجتماع لجنة النقل المنعقد الآن برئاسة اللواء سعيد طعيمة، بحضور وزيرى النقل وشئون مجلس النواب عمر مروان، ورئيس شركة إدارة وتشغيل المترو، لمناقشة سعر تذكرة مترو الأنفاق : " لجنة النقل مش هتكون أبداً محلل لزيادة أسعار تذكرة المترو، واحنا وكل أعضاء اللجنة وكل النواب ضد أى زيادة أسعار الآن".
واستطرد، : "صحيح سعر التذكرة قليل، لكن الوقت دا غلط، الحكومة كده ماشية ضد توجهات الرئيس، وكل يوم بتخنق الناس، وكل يوم أعباء إضافية، واحنا مش عارفين نودى وشنا من الناس فين، أيوه الجنية هيفرق مع رب الأسرة اللى عنده أولاد، مين الأسرة اللى هتقدر تتحمل عبء إضافى 400 جنيه فى الشهر".
واختتم كلمته: "حكومة شريف إسماعيل ليس لديها أى وعى سياسى، بتحل كل مشاكلها على حساب ذبح المواطن، والله العظيم الناس مش لاقية فلوس تركب مواصلات أصلاً بتمشى على رجلها".
