كتب محمد عبد العظيم
ينشر "برلمانى" نص كلمة
الرئيس عبد الفتاح السيسى، حول قانون الخدمة المدنية، والتى ألقاها، اليوم السبت، خلال مشاركته فى احتفالية عيد الشرطة بمقر أكاديمية الشرطة بالقاهرة الجديدة.
خلال الكلمة تطرق "السيسى" إلى قانون الخدمة المدنية، قائلا: "أنا هتكلم، وأنا لا أتدخل فى عمل البرلمان، لكن هقول كلمة بصراحة، لما النهارده يُعرض قانون للإصلاح، وبعدين هذا القانون من وجهة نظر نواب الشعب أنه لم يقر، مفيش مشكلة، لكن أنتم تطلبون منى الإصلاح والتقدم، اوعوا تفتكروا إن الإصلاح والتقدم ضريبة سهلة، لا".
وأضاف "السيسى" قائلا: "المسؤولية بتاعة شعب مصر، مسؤوليتنا جميعًا، ونحن نعيش ولازم نستعد إننا نوفر لأبنائنا وأحفادنا مستقبل كويس، فالإصلاح أمانة فى رقابنا، قبل ما تقول الكلمة ادرس الموضوع كويس".
واستطرد الرئيس عبد الفتاح السيسى فى كلمته: "أنا قلت ثلاث حاجات فى الموضوع ده قبل كده، أول نقطة فيهم يا ترى اللى ما يقرب من 7 ملايين موظف، مصر محتاجة منهم كام؟! محتاجة يمكن يكون مليون، والستة الآخرين موجودين معانا وإلّا مش موجودين؟! لا موجودين، وهذا أول اعتبار، لأن وراء منهم أسر نحن حريصين عليها إننا نكون كلنا مع بعض، والنقطة التانية: هل يا ترى مرتبه هيقل؟! لا، وهذا ثانى اعتبار، والثالث: قلت يا ترى الأموال أو الزيادات المفترضة هيتم حسابها ولا لأ؟ الثلاثة دول، لكن غير كده، أنا بكلم كل الناس اللى بتسمعنى بصراحة، انتوا بتكلموا الدنيا كلها، الدنيا كلها ظروفها الاقتصادية صعبة، ومصر مش بعيدها عن الصعوبة دى".
وتابع الرئيس كلمته: "أنا هقول كلمة لكن أرجو إن الناس ما تقولهاش، لو قلت لكم تعالوا نتنازل شوية لأجل خاطرها هتقول إيه، وأنا بقول الكلام ده عشان هى أمانة فى رقبتنا، لا هي بالمجاملة أو بالمزايدة الشعوب بتحيا، ولكن الشعوب بتحيا بالإخلاص وبالأمانة والشرف والتصدى والتضحية والصبر والجلد، لكن غير كده لأ".
وقال الرئيس عبد الفتاح السيسى فى نهاية حديثه عن قانون الخدمة المدنية: "أنا بقول الكلمتين دول، محدش يتصور إنى بانتقد حد، لكن أنا حبيت أقول عشان انتوا حملتونى المسؤولية هنا، وأنا لوحدى ما أقدرش، وأنا قلت لكم إحنا كلنا مع بعض مشاركين فيها، واوعوا تفتكروا إن الأمر يسير وسهل، إحنا 90 مليون، وجونا ناس قعدة تأذى فينا وتدمّر فينا، خلى بالكم، وأنا خلصت كلامى كده".
