كتب محمود العمرى
رد شادى أبو زيد، المراسل فى برنامج أبلة فاهيتا، وصاحب فيديو الواقى الذكرى المُسئ لقوات الشرطة، على
بيان "فاهيتا" التى أصدرته صباح اليوم، عبر صفحتها الشخصية، لتعتذر فيه لشادى وعساكر الشرطة، قائلًا: "عزيزتى أبلة فاهيتا انتى مش من خصومى".
وقال شادى عبر صفحته الرسمية "فيس بوك": "عزيزتى أبلة فاهيتا، انتى مش من خصومى علشان أزعل منك أو أسامحك، خصومى هم اللى خلوا خوفك يجبرك تقولى كلام غير طبيعتك اللى أنا متعود عليها، خصومى حطولك سقف على برنامجك وما نعينك تسخرى من حاجات كتير كان نفسك تقوليها وقصقصوا فى تقاريرى لما كنت معاكى".
وأضاف قائلًا: "خصومى اللى وقفوا برنامج باسم يوسف ومنعونا حتى نضحك على بلاوينا، وخصومى حكموا بـ٣ سنين سجن عسكرى على صديقى عمرو نوهان بسبب صورة ساخرة، خصومى خطفوا مصطفى ماصونى وغيره كتير ومش عارفين مكانهم ولا عارفين هم عايشين ولا أموات، وخصومى بيتهموا أى حد مختلف عنهم ليل نهار على التليفزيون بالعمالة والخيانة وبيحرضوا على قتلنا وسجننا، وخصومى بيهددوا الفنان أحمد مالك "رغم اعتذاره" بعدم الظهور مجددًا لاستكمال مشواره الفنى بمجرد مشاركته معى فى الفيديو الساخر وبيهددونى إنهم هيأذونى أنا وأهلى.
واختتم "عزيزتى أبلة فاهيتا خصومى ضعاف وتافهين قوى وبيتقمصوا من الهزار وكيانهم بيتهز من كوميكس أو فيديو ١٢٠ ثانية، فاشطة يعنى الموضوع ميستحقش الاعتذار".
