كتب أحمد براء
تحامل النائب إلهامى عجينة، عضو لجنة "حقوق الإنسان" بالبرلمان، على أهالى الشباب ضحايا مركب الهجرة غير الشرعية الغارق على سواحل رشيد، قائلاً: "كل أم بتعيط على ابنها اللى غرق نقولها عيب ماتعيطيش أنتى بعتى ابنك علشان حفنة دولارات".
وقال "عجينة"، فى تصريحاتٍ لـ"برلمانى" تعليقًا على حادث مركب الهجرة غير الشرعية بسواحل رشيد، التى راح ضحيتها أكثر من 51 غريقًا: "الأهل هم أول من باعوا الابن مش الحكومة.. مانجيش نقف جنب الأهالى ونقول غلبانين هيعملوا إيه العيال سافروا علشان لقمة العيش، لا يا حبيبى مش من أجل لقمة العيش، من أجل الثراء، أنت عايز تبقى غنى وتركب عربية، عايز تسكن فى شقة على النيل.. لما كلنا نسكن فى تمليك مين اللى هيأجر؟ هو كلنا هنشتغل دكاتره؟!".
وأضاف "عجينة": "أقول لمن يسمحون لأبنائهم بالهجرة غير الشرعية إن ده انتحار، وخصوصًا إن المستقبل فى الدول الغربية التى يضحى الشباب بحياتهم من أجلها وَهْم وسراب، الأوروبيين نفسهم بيعانوا من البطالة ومش لاقيين شغل!، مش كل واحد راح وجاب قرشين هنبقى زيه".
وأوضح "عجينة": "الدور الوحيد اللى المفروض الدولة تقوم بيه، إنها توعى الشباب عن طريق وسائل الإعلام، مش تقول لهم ماتسافروش، ولكن التوعية بوَهْم تحقيق الثراء فى الغرب.. أنا كنت عايش فى أوروبا وعارف عامله إزاى، فمشكلتنا فى مصر إن إحنا ثقافتنا إن الحكومة المفروض تعمل لنا كل شىء، الثقافة دى لازم تتغير لأنى كمواطن أيضًا مسؤول".
ووجه عضو لجنة "حقوق الإنسان" كلامه للشباب: "كل يوم مراكب بتغرق بسبب الهجرة غير الشرعية، وأنت تطلع برضه وتسافر بالشكل ده؟!، ده تهور وتضحية بالنفس من أجل الثراء وليس لقمة العيش، لأن اللى عايز يشتغل فى مصر هيشتغل، المناطق الصناعية كلها بتعانى من قلة العمالة.. ولكن للى عايز يشتغل!".
واستطرد: "لو مواطن مريض مابيقدرش يشتغل، وماعندوش بيت وماعندوش دَخْل مايجيش يقول لى أنا عايز اشتغل رئيس مجلس إدارة!.. الراجل اللى بيكنس فى الشارع لا يقل أهمية عن الدكتور، أو عن المحامى، أو عن المستشار، فعلى سبيل المثال أنا لو مافتحتش مطعم وقدمت لك أكل مش هتلاقى حد يأكلك.. وأنا كعضو مجلس نواب مش أفضل من الكناس، كل واحد ليه مهمة".
كان الدكتور علاء عثمان، وكيل وزارة الصحة بالبحيرة، قد أكد ارتفاع حصيلة ضحايا حادث غرق مركب الهجرة غير الشرعية بالبحر المتوسط أمام سواحل رشيد إلى 51 شخصًا.
