القليوبية – أحمد عبد الهادى بكير
حرص الدكتور صلاح حسب الله عضو مجلس النواب خلال المؤتمر الجماهيرى الذى عقده مع نواب شبرا الخيمة بنادى المؤسسة الاجتماعية العمالية على توجيه الشكر لأهالى الدائرة على الثقة التى وضعوها به، والذين أعطوه ثقتهم ووضعوا به آمالهم، واعدا بأنه سيسعى جاهدًا ليؤدى دوره السياسى والرقابى والخدمى، ولتوفير حياة كريمة لأهالى الدائرة، مشيرًا إلى أن دائرة شبرا الخيمة ظلت مهمشة لعدة سنوات.
وقال حسب الله: " أنا وزملائى المهندس محمود عطية والدكتور نضال السعيد " أيد واحدة " ومن يعتقد غير ذلك فهو واهم وعليه أن يستوعب الحقيقة . مضيفا:" لن يرهبنا من يشتمنا ويقول علينا نواب العزاءات".
وتابع حسب الله " إحنا مش عنينا على انتخابات ثانية والكلام ده بالأصالة عن نفسى وعن النائب الدكتور محمود عطية والدكتور نضال السعيد، مش عنينا على الانتخابات ثانية، يا عالم إحنا معانا زملائنا جوه المجلس كانوا فى يوم منفعلين وبيقدموا طلب إحاطة علشان يناقشوه وتانى يوم توفاهم الله قبل كتابة كلمه فى طلب الاحاطة".
وأضاف:"اسمحولى أمر مرور سريع على اللى تم فى شبرا الخيمة خلال عام وكل حاجه هقولها على فكرة هى مشاركة ثلاثية مشتركة محمود ونضال وصلاح ،احنا لما بدأنا يا جماعه كان عندنا عدد من مشكلات تتعلق بالصرف الصحى، ومشكلات تتعلق بالرصف والتبليط، ومشكلات تتعلق بالخدمة الصحية المقدمة والخدمات الشبابية ، احيانا مثلا تيجى منطقة ترصف وتلاقى حد بيقولك يا عم دول مش النواب لكننا لن نلتفت لكلام هؤلاء المغرضين".
واستكمل :"منطقة بيجام اللى كانت منسيه بقالها فترة احنا تواصلنا مع ادارة التنمية المحلية وتمت الموافقة على مبلغ 14 مليون جنية على 4 مراحل منهم مرحلة بالفعل تم ارسال 3.5 مليون جنية ، الفكرة اننا بنحفر فى الصخر وبنجيب فلوس من خارج خطة المحافظة ".
وتابع :"احنا جرينا فى منطقة الشرقاويه القديمه اللى من 30و40 سنه محدش سأل فيها أدرجت فى العام المالى والخطة لوزارة الاسكان والمرافق ل 2016,2017بإدخال مشروع الصرف الصحى بمنطقة الشرقاوية القديمة ، واحلال وتجديد شبكة الصرف الصحى فى شبرا الخيمة فى منطقه ام بيومى وعزبة عثمان ومساكن نوبار وبيجام ".
