بالفيديو.. ضابط شرطة: "حادث الدرب الأحمر تصرف طايش ميرضيش أى بنى آدم عاقل فى البلد"

تداول رواد موقع التواصل الاجتماعى "فيس بوك"، مقطع فيديو لأحد ضباط الشرطة، برتبة رائد، يعلق فيه على حادث الدرب الأحمر، والذى راح ضحيته سائق شاب يدعى عادل محمد، وشهرته "عادل دربكة"، حيث قال: "زى ما كنت بطلع كل مرة بتكلم وبوضح لما بشوف أى موقف بيحاول يسيئ لوزارة الداخلية، ضباطها وأفرادها، بدون وجه حق، فالحق النهاردة يخلينى أطلع وأقول كلمتين: اللى حصل إمبارح من أمين الشرطة فى واقعة الدرب الأحمر دا ميرضيش أى بنى آدم فى البلد، بغض النظر بقى عن شغله واتجاهاته وانتماءاته، لا وزارة الداخلية بكل اللى شغالين فيها يرضيهم اللى حصل ولا أى بنى آدم عاقل فى البلد دى يرضيه اللى حصل إمبارح".

وأضاف ضابط الشرطة: "واحد راح بدون وجه حق، وبدون ذنب، بسبب تصرف طايش من بنى آدم تانى دوره أنه يحفظ الأمن مش إنه يضيعه، وهنا بقى لازم نقف كلنا ونتكلم ونقول اللى غلط مينفعش يتسكت عليه أبدا، وزى ما كلنا بنكره فكرة التعميم وبنهاجمها فلازم بردو اللى غلطان بفعلته يتحاسب".

وتابع الضابط: "طبعا الوزارة من إمبارح مسكتتش وشغالة عشان تقدم اللى حصل إمبارح للمحاكمة الجنائية، وعمرنا ما هنسكت على واحد غلطان فينا، ولا عمرنا هنفقد احترامنا ولا مصداقيتنا عند الناس بسبب تصرف واحد، عشان إيه مفيش حد عاقل ممكن يقول كده، دى أرواح ناس ودا أمن بلد، وعمرنا ما هنفرط فيه، وعمرنا ما هنخلى أى حدث يولع البلد علشان يتقال إننا بندارى على حد ولا عاوزين الوحش فينا".

واستطرد الرائد: "وفى الآخر أنا عايز أقول كلمة واحدة لأفراد الشرطة: يا حضرات الظباط والأفراد بيكونوا شكل الوزارة وزى إحنا دايما ما بيتقالنا وبنقول لبعضنا خلى بالنا من نفسنا، ويا ظباط خلوا بالكوا من تصرفاتكو، يا حضرات يا أفراد لو سمحتوا إحنا عاوزين نخلى شكلنا أحسن من دلوقتى، انتوا ميرضيكوش إن كل الحاجات الكويسة اللى انتوا بتعملوها تروح بسبب تصرف فردى من حد فيكو، ميرضيكوش إن الناس تتكلم عليكو وتقول أمناء الشرطة وأفراد الشرطة بيعملوا ويخلوا ويسووا، فيكو ناس كتير كويسة، وفيكو واحد بيطلع زى اللى حصل إمبارح يضيع كل اللى انتوا بتعملوه، خلوا بالكوا من نفسكوا لأن لما حد بيتكلم عليك كلمة أنا بزعل لأنك أنت شكل وزارتى، لأن زى ما أنا شكل الوزارة، أنت كمان الغلطة منك بتخلى شكلنا كلنا وحش، خلوا بالكوا من نفسكوا ومن تصرفاتكوا".