بالفيديو.. إيهاب غطاطى:مش بعد ثورتين انتخابات اللجان تبقى كيكة وتقسيمات

سجل النائب البرلمانى إيهاب الغطاطى اعتراضه على نتائج انتخابات لجنة الزراعة، مشيرًا إلى أن الأمور كانت تسير فى اللجنة بالتربيطات، وأنه لا يوجد أى من الفائزين برئاسة اللجنة يحمل أجندة تشريعية تخدم الزراعة.

وأضاف "غطاطى" خلال حوار مسجل لموقع "برلمانى" قائلًا: "قاعدين يحلفوا على المصحف مع بعض ويعملوا تربيطات، هما دول صفوة المجتمع اللى انتخبهم الشعب المصرى، ما ينفعش بعد ثورتين، وجايين علشان نبنى بلدنا، تبقى العملية كيكة وتقسيمات، وحلفانات على المصحف وتربيطات على اللجان، دون معايير للكفاءة، أنا هقعد فى لجنة الزراعة واتفرج على الرئيس والوكيلين وأمين السر، الذين تم انتخابتهم، وهشوف هيعملوا أيه لمصر".

واستكمل "غطاطى" حديثه قائلًا: "رئيس اللجنة فى انتخابات الوكيلين، خالف اللائحة وما يعرفش أنها بتلزم المرشح أن يحصل على نصف عدد الأصوات + 1 حتى يفوز برئاستها، مش بأكثرية عدد الأصوات، واللى ما حققش الرقم ده لابد من إجراء إعادة بين المرشحين".

وأضاف "غطاطى" قائلًا: "فين تمكين الشباب اللى الرئيس اتكلم عليه فين الكفاءات، الرئيس طالع عينه فى البلد، واحنا بنحضر دراسات، وناخذ دكتوراه وفى الآخر تتحط فى الدرج، وأنا مش هطعن على النتيجة وربنا يوفقهم، وهما عاملين تربيطات مسبقة، والأسماء كلنا عارفينها من 5 أيام".