فرحة أهالى الدقى بنائبهم الشوبكى

قضت محكمة النقض، أمس، بإلغاء قرار اللجنة العليا للانتخابات البرلمانية رقم 107 لسنة 2015 المنشور بالجريدة الرسمية فى 31/10/2015 العدد 44 مكرر، فيما تضمنه من إعلان فوز المطعون ضده – أحمد مرتضى منصور – والقضاء بعدم صحة عضويته بمجلس النواب للمقعد الفردى بدائرة الدقى والعجوزة".

وحكمت المحكمة بصحة عضوية الدكتور عمرو الشوبكى بمجلس النواب للمقعد الفردى، دائرة الدقى والعجوزة بمحافظة الجيزة، وألزمت المطعون ضده "منصور" بدفع أتعاب المحاماة والمصاريف.

وفى جولة لــ"برلمانى" بنطاق دائرة الدقى والعجوزة للوقوف على استقبال مواطنى الدائرة قرار محكمة النقض باستبعاد أحمد مرتضى منصور، أكد المواطنون أن ما حدث أفضل، خاصة أن نجل مرتضى منصور لم يظهر بالدائرة فور فوزه فى الانتخابات.

فى البداية تقول السيدة صفية إبراهيم أحد سكان منطقة العجوزة، أول حاجة وعدنا هيشوف موضوع شقق لينا وبقى يوقف العربيات ويحملنا ومعملش لينا أى حاجة، إنما عبد الرحيم على وقف معانا بصراحة وأى بنت تحتاج حاجه بيجبها ليها إنما ابن مرتضى منصور أبدا معملش جنس حاجة، وجه يوم العزومة وبالسلامة يا قلبى مش شوفنا وشه تانى، وورانا البير مليان مياه وسارح تحت العماير وهتقع.

وتابعت السيدة المسنة "والله العظيم أنا انتخبت الدكتور عمرو الشوبكى وزعلت عليه لما سقط بس ولادى انتخبوا ابن مرتضى منصور أنا فرحت أوى النهارده إن ربنا كرم الشوبكى وأهل العجوزة كلهم فرحانين ونطالبه أن ييجى فى وسطنا ويقولنا هعملكم ويشوف الشقق بتاعتنا، إنما أحمد مرتضى محدش شافه وضحك على الشباب وقالهم هعمل لكم ملعب تقعدوا فيه وجنينه، ولكن الحى قافلها ومحدش مستفيد منها إنما عبد الرحيم على كرمنى".

بدورها قالت إحدى السيدات وتدعى عبير محمود " أحمد مرتضى نزل مرتين قبل الانتخابات ومن بعدها محدش شافه ومش بيعمل حاجة لحد وكلهم قبل الانتخابات بيقولوا هنعمل ومفيش حد بيشوفهم، متابعة بطالب عمرو الشوبكى أن يشغل ليا جوزى عاطل واحنا 6 فى البيت وابنى فى الجيش وبنتين عاوزين يجوزوا ومفيش أى إمكانيات وعاوزين نشوف مشاكل الشباب".

فيما قال أحد الشباب، إن عمرو الشوبكى أفضل ومثقف وكان ناجح بيها فى الأول لكن أحمد مرتضى منصور نجح بالفلوس ومحدش بيشوفه وبطالب النائب الجديد أن ينزل يلف على الناس ويشوف مطالبهم ".

من جانبه قال أحد قاطنى منطقة الدقى، أنا كحيثيات حكم معرفش بس أنا رشحت أن عمرو الشوبكى أفضل لأنه خريج اقتصاد وعلوم سياسية وعنده خبره بالبرلمان وتشريع القوانين وأطالبه أن يركز على تشريع القوانين ولا ينشغل بالخدمات لأنها تخص الحكومة، متابعًا الشوبكى عن شعبية كبيرة يركز عليها الفترة القادمة".

كما أكد مواطن آخر أن عمرو الشوبكى أفضل ولديه خبرة أكثر من أحمد مرتضى ونفسنا ربنا ينصر البلد وتطور ونقضى على الفساد ".