خالد صلاح فى وصلة نقد ضد عكاشة

فى وصلة من النقد اللاذع، استنكر الكاتب الصحفى خالد صلاح، رئيس مجلس إدارة وتحرير "اليوم السابع"، تصرفات النائب توفيق عكاشة، متسائلا عما يفعله داخل البرلمان، مؤكدا أن "عكاشة" كذب على مصر بأكملها عندما قال إنه سيستقيل من المجلس، موجها حديثه للنائب: "أنت مش قولت هتستقيل يا توفيق؟، وهعمل توكيل لأمى وهى هتروح تبيع الأرض وهسافر وبعدين هتبيع الأرض وهتحولى الفلوس، أنت فاضى للشتيمه ليه؟، يعنى فين الانضباط دا أنت فى حوار سابق معانا كنت كويس وقلنا يمكن ربنا هداه ووصل إلى رشد سياسى".

ما يفعله "عكاشة" حاليا يساهم فى هدم البرلمان بسبب كذبه سياسًيا

وقال خالد صلاح، ببرنامج "آخر النهار" الذى يذاع على فضائية النهار، "إن ما يفعله "عكاشة" حاليا يساهم فى هدم البرلمان، بسبب كذبه سياسًيا عندما صرح باستقالته وتراجع، وقال أنا معايا النواب وهترشح على رئاسة المجلس وفشل، ولما فشل قال بيقطعوا عليا النور، وقال هدعى 300 نائب أيام انتخابات رئيس البرلمان فذهب إليه 3 نواب.. والـ3 كانوا قاعدين بالصدفة ونفوا بعد كده إنهم كانوا رايحين له، والتلاتة دول كانوا موجودين فى البهو الفرعونى فراح سحب كرسى وقعد جنبهم وقال هشرب معاهم شاى وقت دعوته لانتخابه رئيسًا للمجلس، ولما الخبر اتنشر قال إن وزير الشئون القانونية وأمين عام مجلس النواب قطعوا عليا النور ومنعوا النواب من الدخول"، مستنكرا: "ما هذا الهلس السياسى ده؟، إيه الهوس الغريب اللى شايفينه ده؟ ليه كده دا إحنا كنا نظنك إنك خلاص ربنا هداك".

لما اتزنق طالب بانتخابات رئاسية علشان ينطح فى الرئيس السيسى

وأوضح رئيس مجلس إدارة وتحرير "اليوم السابع"، أن النائب البرلمانى توفيق عكاشة لم يستطع إثبات ذاته سياسيًا، أو يقترح شىء أو حتى يدير محطته الفضائية اقتصاديًا، مضيفا: "كل ما يزعل يطالب بانتخابات رئاسية مبكرة يعنى هو أنت الناس منتخبتكش فى البرلمان وأنت مش عارف تثبت ذاتك سياسيًا ولا عارف تقترح حاجة ولا عارف تدير محطتك اقتصاديا، ولما تتزنق داير مشتمة فى الناس وتقول انتخابات رئاسية مبكرة علشان تنطح فى الرئيس السيسى، وأنت مفكر أن ده هيرجعلك أى مصداقية وسط كل هذه الأكاذيب السياسية التى رددتها على الناس وفى البرلمان، ليه كل ده ليه الفوضى دى؟".


وتابع: "أنا لو من نبروه كنت شعرت بالخذلان لو انتخبتك، لأنك قولت حاجة ورحت عملت حاجة تانية، تروح تتخانق مع ضباط شرطة وصحفيين صغيرين وتشتم الناس فى محطتك".

روائيون وأدباء بيتسجنوا وتوفيق بره بيشتم مصر كلها

وتابع صلاح: "دلوقتى مصر بتسجن روائيين.. أنت بتقول قلالات أدب يتسجنوا، طيب فاطمة ناعوت عليها حكم، إسلام بحيرى فى السجن، من تظاهر دون إذن فى السجن طيب وتوفيق عكاشة اللى شاتم مصر كلها ده، واللى كذب ملايين الأكاذيب السياسية داخل البرلمان، واللى مسخر المحطة للمشتمة، دا لو كان له فلوس عند حد يطلع يشتمه فى البرلمان، وأنا فاكر كنا فى احتفالات 6 أكتوبر الماضية وكنا فى الكلية الحربية وقابل أحد الزملاء وقال له أنا ليا عندك فلوس إعلانات لو مجبتهاش هفضل اشتمك فى محطتى لحد ما تدينى الفلوس اللى عليك".

واستطرد خالد صلاح، قائلا: "هذه النماذج التى تصدرت المشهد فى المجتمع للأسف الشديد بالفوضى والحقيقة برخاوة الأداء القانونى مليون مرة يحصل أخطاء وعليه ديون كثيرة فى لمدينة الإنتاج الإعلامى طيب فين الدولة؟، طيب زمان الدولة كانت تختار المعارضين وكانوا قيمة وقامات المهندس إبراهيم شكرى وكمال أحمد والحاجات العظيمة النبيلة حتى اليسار المصرى العظيم النبيل المصمم على موقفه نختلف معه ولكنه يطرح موقف سياسى وفكرى وخلاف وطنى مع السادات على كامب ديفيد ومع السادات وانتفاضة الخبز على الانفتاح وسياسته وقضايا تخص البلد، واختلفنا مع مبارك على الخصخصة وبيع البلد والتوريث، اختلفنا بفكر ورقى، أما حاليا اختلفنا على إيه، عايز تروح تشتم الصحفيين ومحدش يكلمك؟ عايز أنت تشتم الناس ومتتشتمش؟، عايز تفتح كل الفضائيات شتيمة وأنت متتشتمش؟، دا إيه الهوس السياسى ده؟ الدولة لازم تفعل القانون نائب أو مش نائب هو أنت بتتفرعن بالحصانة؟"، خايف على برلمان بلدى من أمثال توفيق عكاشة.

وواصل خالد صلاح هجومه على توفيق عكاشة قائلاً: "رأيى اللى زى توفيق عكاشة ده شوهوا السياسة فى مصر وأنا أسف بصراحة بس خايف على برلمان بلدى، زى عيل صغير لما يبقى فى زفه ويرمى طوبة فى الكلوب العيال الصغيرة بتهيص وراه، فأنت أمامك نوعين من التحفيز، تحفز الناس على أداء وطنى حقيقى وفاعل، أو تحفزهم على الفوضى والإسفاف والانحطاط اللفظى والعدوان الأخلاقى والكذب السياسى على الناس، وهذه النماذج حفزت الكذب السياسى والانحطاط فى طريقة الأداء السياسى، وهذه مأساة، وبعدين مليون بلاغ سواء للنيابة أو الأجهزة ولا أى حاجة وبيفتحوها مشتمة إزاى ده إعلام قائم؟ وإزاى موجود ومنتشر.. ده إفساد لعقول أطفالنا والسياسيين الصغيرين، ليه لأنه عندما تزرع فى عقول سياسيين وشباب صغير أنه عندما تكون أكثر احترافا للكذب السياسى وأكثر قدرة على اختيار ألفاظ مسيئة وغير مؤدبة يبقى تكسب أكتر؟".

عكاشة تجاوز الأدب مع الصحفيين ولابد من وقفة ضده

وأردف خالد صلاح: "يبقى لما تعمل كده أنت بتخلى الناس تصل إلى مرحلة أن توفيق عكاشة نموذج، دى حاجات لازم لها مواقف، هو إمبارح شتم الزملاء الصحفيين وتجاوز فى الألفاظ وتجاوز فى الأدب، والمفترض أنه نموذج يتم تصديره للناس، عيب، بس هل هذا البرلمان سيستمر على هذا النهج، دا فؤاد بدراوى دخل الجلسة وقالهم لو فضلنا كده البرلمان ده هيتحل، طبعا لو من الحكومة يتلعب بيه، خسارة نصل إلى مرحلة من الإحباط على النحو المخيف من الأداء البرلمانى وأن يعبث صغار السياسيين وطفيليات الساحة الإعلامية تعبث بنا إلى هذه الدرجة وتوصلنا للدرجة دى، ولا نبرئ نفسنا من الأخطاء لكن من الانحطاط الإعلامى والسياسى".