نواب يطلبون رفع السجائر لـ200 جنيه

أثار طلب الإحاطة الذى تقدم به النائب البرلمانى محمود عطية، لوزير التجارة والصناعة، بسبب ارتفاع أسعار السجائر، الجدل بين النواب خاصة أنه أشار إلى أن أسباب ارتفاع الأسعار جاء نتيجة عجز الشركات العاملة فى مجال صناعة السجائر عن توفير العملة الأجنبية اللازمة لاستيراد مستلزمات ومنتجات التصنيع، البعض استنكر تلك الخطوة وطالب بتوفير العملة الصعبة لأمور أكثر أهمية، وآخرين طالبوا بوضع زيادات أخرى على السجائر لإجبار المواطنين على الإقلاع عنها.

على عبد الونيس: هنسيب كل حاجة ونمسك فى السجائر وياريت سعرها يوصل لـ200 جنيه

قال النائب البرلمانى على عبد الونيس، عضو مجلس النواب، مع احترامى للنائب محمود عطية، إلا أن هذا الكلام مرفوض للأسف، "إن شاء الله السجائر تولع ويصل سعرها لـ200 جنيه، عملة صعبة إيه إلى نوفرها للسجائر، بدل من نوفر العملة الصعبة للبن الأطفال والدواء ونحل مشكلة البطالة، دى ناس مش حاسة بالمسؤولية".


وأضاف"عبد الونيس" قائلًا: اللى عايز يشرب سجائر يشرب واللى مش معاه يشرب عنه ما شرب، ده كلام ناس فاضية، وبالنسبة للسجائر المهربة اللى هيلجأ ليها الشباب فى حالة ارتفاع أسعار السجائر براحتهم يروحوا يشربوا سم أحسن لهم، ونبقى ارتحنا منهم، وأنا عندى ولاد وحاسس بالأزمة وعارف خطورة السجائر، وأسعار كل حاجة فى البلد غليت بسبب ارتفاع سعر الدولار هنسيب كل حاجة ونمسك فى السجائر.

جمال الشويخى: السجائر خسارة مالية وصحية وياريت الدولة ترفع أسعارها أكتر

وقال النائب جمال الشويخى، إنه رغم احترامه للنائب البرلمانى محمود عطية، إلا أنه لا تعليق لديه على طلب الإحاطة المقدم من جانبه بسبب ارتفاع أسعار السجائر ومطالبته بتوفير العملة الصعبة لاستيراد المواد المستخدمة فى صناعتها، وأن الظروف الحالية للبلد غير مواتية للحديث عن مثل تلك الأمور، إلا إذا كان الأمر مسألة تجارة.


وأضاف"الشويخى" قائلًا: "نفسى الناس تبطل تدخين وأنا عارف إن كلامى هيزعل ناس كتير ومش هيعجب حد، لكن السجائر خسارة مالية وصحية وأسرية، وياريت الدولة ترفع أسعار السجائر أكتر وأكتر علشان الناس تبطلها، إحنا عندنا مشكلات كتير ومحتاجين نوفر العملة الصعبة لاستخدامها فى تهئية المناخ الاستثمارى للدولة.

سعيد شبايك: ماحدش يقدر يستغنى عنها والشركات بتحط عليها "صراصير" وبنشربها

ومن جانبه قال النائب البرلمانى سعيد شبايك، عضو مجلس النواب، إن الشركات حتى الآن، لم ترفع أسعار السجائر وأن من رفع أسعارها هم التجار مستغلين أزمة ارتفاع سعر الدولار مقابل الجنيه، وهذه أزمة مفتعلة أشعلها التجار.


وأضاف"شبايك" قائلًا: "ما حدش يقدر يستغنى عن السجائر والشركات بتحط على العلب صور "سرطان" و"صراصير" وعلى الرغم من ده بنشتريها وبنشربها، وأنا أول واحد بشربها، وأنا هتكلم مع زميلى النائب محمود عطية اللى تقدم بطلب إحاطة لمعرفة أسباب ارتفاع أسعار السجائر وهنسق معه.