عفاف شعيب تحمى مصر من الأعداء
هل تعلم حضرتك وأنت تعيش حياتك بطريقة عادية، أن أحد الشيوخ تقدم للفنانة عفاف شعيب لطلب يدها؟، لكنها رفضت رفضًا قاطعًا لأنه - بحسب ما قالت - من أعداء مصر، وتسبب فى حدوث مصائب كثيرة فى البلد! تعرف انت الموضوع ده؟!.. طب هل تعلم أن عفاف شعيب هاجمته بعد أن عرفت حقيقته، وطلبت منه عدم الاتصال بها مرة أخرى.. تعرف؟! والله ولا انت تعرف، ولا الحكومة تعرف، ولا حد حاسب «العدو» ده على كوارثه، بس أبلة عفاف عرفت لوحدها، وعاقبته أشد عقاب، وحرمته منها ومن الريش والبيتزا التى كان سيعوم فيها لو لم يكن من أعداء الوطن، الله ينور يا فنانة.
اسألنى: ليه اختيار وزير التموين اتأخر؟!.. وهجاوبك
بص يا سيدى، رئيس الوزراء أعلن عن اختيار وزير التموين الجديد خلال أيام خلفًا للوزير المستقيل خالد حنفى، وهنا ممكن حضرتك تسأل: طب ليه الموضوع هيستغرق أيام للبحث عن وزير جديد؟!.. حقك طبعًا، أنا هقولك بيتأخروا ليه.. الموضوع مش سهل، لكن بنظرة عامة على الحكومة تقدر تفهم سبب التأخير، طبعًا هتلاقى أسماء كتير جدًا مرشحة للوزارة، وممكن كلهم يبقوا وزرا، ومفيش أى مشكلة، لكن طبعًا اختيار الوزير الأفشل، وصاحب أسوأ أفكار ممكنة، وأكثر تصريحات مستفزة، أكيد بياخد وقت، انتو حاسين بحاجة؟!.. إنها مهمة صعبة، ولكن الحكومة قدها وقدود.. ربنا معاهم يا رب.
