كتب محمد صبحى
شن الإعلامى محمد شردى هجومًا حادًا على النائب إلهامى عجينة، عضو مجلس النواب، بسبب تصريحه حول أن نصف رجال مصر لديهم ضعف جنسى، قائلًا: "أنا مش هسكت وطالما المسألة كدا نطلع التصريحات الحلوة اللى بتقولها علشان الشعب يعرف إنكم بتغطوا على إنجازاتكم بمثل تلك التصريحات".
وتابع "طيب بذمتكم لما أكون إعلامى وييجى ليا تصريح زى دا ويتاخد ويترجم برا وهما برا مش يهمهم إنك بتطلع قوانين لأنه معروف إنك بتطلع قوانين لما تكون مصر دوليًا مهتمة بقانون زى دا، ويطلع رجل منتخب وعضو مجلس النواب ويقول تصريح زى دا ويقول الكلام دا طيب النواب هتردوا تقولوا إيه وفين الصعايدة يتكلموا بقى، وصل الأمر أن نائب بالبرلمان المصرى يصل تفكيره وتصل به الثقافة أن يقول لو عملنا الختان مش هيبين عجز الرجالة ومعلش الستات تستحمل".
وأضاف "شردى" خلال برنامجه "يوم بيوم" المذاع على فضائية "النهار"، "أهلا بيك أهلا بحضرتك بالأمانة أنت أهنت مصر كلها ودا بقا اللى يتحول للجنة القيم ودا يتجاب وتعلموه يعنى أيه تصريح زى دا وطبيا كمان بتتكلم غلطك، واللى انت متعرفوش يا نائب إنك لو سيبت الست على طبيعتها مش هتحتاج أنك تاخد منشطات دى خيبة قوية أن يصل حال فكر نائب إلى هذا الانحدار وهذا المستوى الفج من الحديث، اطلع بقا هاجمنى علشان بنتقدك وقول عليا سفيه وهنطلع قانون ضدهم وهنقل لهم العجلة اطلع اكلم ورينى وقولى إيه دا وترجعوا تزعلوا إنى بيقول دا انعكاس للعشوائيات الموجودة فى مصر، عمومًا دا تصريح واحد تحبوا كل يوم نمسك 3، 4 تصريحات ونقعد لحضراتكم ونوريكم تصريحاتكم وكلام النواب".
