كتب مصطفى النجار
قال عصام الفقى أمين سر لجنة الخطة والموازنة بمجلس النواب، إن يوم 30 يونيو القادم سيكون يوما للحساب العسير للحكومة من نواب الشعب، وطالب بإقالة المقصرين من المسئولين الحكوميين.
وشدد النائب عصام الفقى، فى تصريح لـ"برلمانى" على أن "البلد مبقاش فيها هزار وعايزين الجد فقط، وأى حاجة في مصلحة البلد هتتعمل".
واستطرد "الفقى": "أنا شايف المهندس محمد السويدي زعيم الأغلبية البرلمانية، مبيهزرش وواخد العملية بجد وهيبقي في خطوات جادة وفعالة سيشعر بها رجل الشارع العادى فى حياته اليومية، وكل القرارات التى تتخذ في صالح البلد، وإوعى تفكر أن في حد سيتم مجاملته خلاص انتهى عصر المجاملات".
وتابع: "لما كنت بتكلم عن هيكلة الجهاز الإدارى للدولة، انت عايز تشتغل في القطاع الحكومى عشان تضمن مرتب، لا ده مفهوم خاطئ ولابد من تحقيق التنمية وتشجيع الاستثمار وتشجيع العمل في القطاع الخاص، وأعتقد أن 80% من الموظفين يتقاضوا أجرا بدون أداء عمل، والهيئات الاقتصادية تسبب عبئا كبيرا على الموازنة، واحنا مش هنجامل حد، وسنعتمد العمل مقابل الأداء، ولو طبق هذا النظام البلد هتتقدم البلد لأنه مينفعش أخد مرتب وأروح الشغل مرة ولا مرتين كل أسبوع".
