كتب أحمد طارق
دشن النائب البرلمانى مرتضى منصور رئيس نادى الزمالك، مبادرة للصلح مع أعضاء "وايت نايتس"، للعودة لمساندة فريقهم من المدرجات، شريطة أن تقدم رابطة المشجعين اعتذاراً رسمياً لأعضاء الجمعية العمومية، ولكيان القلعة البيضاء، وأن يبتعدوا عن أعمال الشغب.
وقال النائب مرتضى منصور، خلال تصريحاته لبرنامج "اللعبة الحلوة"، إنه لا يشترط أن يقدم الوايت نايتس اعتذارهم لشخصه، مشيرا إلى أنه نجح فى الحصول على حقه، مضيفا: "أنا بنى آدم معرض للنقد، وبتشتم من زمان وحقى هخده من المحكمة، لكن الوايت نايتس رايح النهاردة الكاميرون عشان يولع شمروخ ويغرم ناديه مليون جنيه، ودخلتوا فى ماتش السلة بعد ألتراس أهلاوى ولو مادخلتوش كان الماتش حُسب للزمالك.. حضرتك عايز تبقى جمهور الزمالك الحقيقى تقول أنا جمهور الزمالك وبعتذر عن الفترة اللى فاتت وللجماهير المحترمة، وعايز أبدأ من أول وجديد معاكم".
وأوضح النائب البرلمانى قائلا: "هكون أنا أول واحد يدخلهم المدرجات وهقدملهم بطاقات العضوية، ويخشوا يفرحوا ويغنوا ويساندوا فريقهم، والاعتذار يكون للنادى وجماهيره وأعضاء الجمعية العمومية، مش عايز حد يعتذرلى لأن كلهم عيال صغيرة، ولو فضلتم فى العناد مش هتخش ولو رحت الهند مش هتخش، لأن رئيس ناديكم أسد وقلبه حديد وأيده طايلة فى كل مكان".
