أخطر فتوى للشيخ ميزو:"الفلوس اللى بياخدوها النواب حرام.. دول رايحين يشربوا شاى وقهوة"

قال محمد عبد الله نصر، المعروف إعلاميا بـ"الشيخ ميزو"، إن المكافآت والبدلات التى يتقاضاها نواب البرلمان«حرام»، وإن لم يتقدموا باستقالاتهم فإن الشعب سيخرج لحل مجلس النواب.

وأضاف الشيخ ميزو، فى تصريحات خاصة لـ"برلمانى"، اليوم الثلاثاء، قائلا:" البرلمان كله وجوده زى عدمه بالنسبالى، والمرتبات اللى بيخدوها النواب حرام، وأرجو من الدولة لو البرلمان مش عايز يشتغل يبقى الشعب مش عايزه، لأن معندناش رفاهية أننا نضيع مليار جنيه ميزانية البرلمان على ناس رايحة تشرب شاى وقهوة".

وتابع:"إذا استمر أداء البرلمان كما هو عليه، فالأفضل حله، وإن لم يستقيل النواب، الشعب هو اللى هيحله بنفسه، لأننا مش عايزين نحمل الدولة عبء مادى ومعنوى، ورجاء الفلوس اللى بياخدوها ترجع لخزينة الدولة لأنها حراااام".

وعن تقييمه لأداء اللجنة الدينية فى البرلمان، أوضح "الشيخ ميزو"، قائلا:"هى فين اللجنة الدينية دى؟ دى عاملة زى خيال الظل اللى كان بيتحط فى الغيطان، يعنى وجودها زى عدمه".

واستطرد قائلا:"كان المفترض على اللجنة أنها تعمل لجان استماع للمفكرين والمثقفين لبحث تجديد الخطاب الدينى وتطويره، والدفاع عن الدين، بجانب وضع خطة لمواجهة الارهاب وانتشار الالحاد.. فين ده كله؟"

وأضاف:"اللجنة فشلت فى أداء مهمتها وأرجو من اعضاءها أن يوفره فلوس بدل اللجان اللى بياخدوها، ويروحوا للجنة ترفيه أو يعملوا رحلات للنواب، دول بيلعبو".