شاهد.. جابر القرموطى مهاجما "مرتضى": "التلاجة بتاعتى وهاخدها معايا حتى لو رحت سجن طرة"

علق الإعلامى جابر القرموطى، مقدم برنامج "مانشت القرموطى" على فضائية "العاصمة 2" على تصريحات النائب مرتضى منصور التى قال فيها: "أنا مشترى القناة علشان جابر يمشى، أنا همشّيه، بس المشكلة فى التلاجة بتاعته اللى بيدخل فيها ومش عايز يطلع".



وقال الإعلامى جابر القرموطى، فى أول تعليق له على تصريحات "مرتضى منصور"، خلال حديثه عن قانون الاستثمار فى برنامجه: "أنا زهقت من كتر ما بجيب التلاجة معايا، وعلى رأى مرتضى منصور لما أتكلم عن التلاجة عشان هيشترى القناة، طبعًا لو اشتريت القناة هاخد التلاجة بتاعتى معايا، أنا أقدر أسيبهالك، أسيبهالك ليه يا سيادة المستشار، دى ياريت يكون فيها مانجة ولا عصير، دى تلاجة جامدة كلها قرارات وتفعيلات وحاجات واقفة".

وأضاف: "إحنا مش حطين التلاجة كده عشان نأكل ونشرب فيها يا سيادة المستشار.. وهاخدها معايا لو مشيت حتى لو روحت سجن طرة هاخدها معايا برضو".

جدير بالذكر أن النائب مرتضى منصور، عضو مجلس النواب ورئيس مجلس إدارة نادى الزمالك، أكد أن التفاوض على شراء قناة "العاصمة 2" ما زال قائمًا حتى الآن، لافتًا إلى أن رئيس مجلس الإدارة النائب سعيد حساسين، والإعلامى ممتاز القط، يعملان الآن على جرد محتويات القناة تمهيدًا لإتمام الصفقة، مشدّدًا على أن نادى الزمالك هو الذى سيشترى القناة وليس مرتضى منصور، وتابع ضاحكًا: "هقدم برنامج لمدة 5 دقائق اسمه مع جزمة مرتضى منصور".

وأضاف "منصور" - خلال اتصال هاتفى مع برنامج "مع شوبير"، المذاع عبر فضائية "صدى البلد" – أنه سينهى تعاقد الإعلامى جابر القرموطى مقدم برنامج "مانشيت"، متابعًا: "أنا مشتريها علشان جابر يمشى، أنا همشّيه، بس المشكلة فى التلاجة بتاعته اللى بيدخل فيها ومش عايز يطلع".