أديب يرد بقوة على تهديدات مرتضى بإغلاق برنامجه: "باخد حقى بدراعى.. وعارف أخده كويس"

رد الإعلامى عمرو أديب، مقدم برنامج "القاهرة اليوم"، على تهديدات المستشار مرتضى منصور، عضو مجلس النواب، رئيس نادى الزمالك، بشكل قوى للغاية، حيث قال: "قررت الدخول فى هذا الموضوع للنهاية، ولن نعيش تحت إرهاب أو ابتزاز، ولن نسمح أن يسىء أحد للسمع ويخدش حياء الآخرين، والبرنامج بيقول للأعور إنت أعور فى عينك"، متابعًا: "وأنا قررت المواجهة، وليس لدى ما أخشاه أو أخشى عليه، ومرتضى واخد المجلس زيارة ومقاولة ولحسابه، وأقنعهم بالكذب ومفيش توقيعات وناس توقيعاتها مزورة والبعض أنكر ذلك".

وأضاف "أديب": "مرتضى كلم الإدارة، وهدد بإرسال ناس لتكسير الاستوديو.. ياريت يا أخى، تعالى راجل لراجل وورينى نفسك.. إحنا رجالة طول عمرنا وتربينا رجالة وعمرنا ما خوفنا.. كان غيرك أشطر.. أنت كنت تحت السرير وكنت عارف مين اللى كان بيحميك.. فاكر ولا لأ.. المجتمع عارف بس بينافقه.. أنا باخد حقى بدراعى.. وعارف أخده كويس.. مبخفش ومكمل للآخر يا أنا يا أنت فى مصر.. عمرو عمره ما خاف ولا تراجع، وحلقة ميدو هتتذاع إلا إذا أنت عملت حاجة فى ميدو".

وتابع مقدم برنامج "القاهرة اليوم": "مادام محدش بيلمك أنا اللى هلمك، وأنا واقف قدامك ومش هاسكت.. ولو تعرف أنا معايا إيه والله مش هتقعد فى مصر.. إنت كنت على السرير يا بنى.. إنت ناسى ولا إيه.. وعاوز يبقى رئيس لجنة حقوق الإنسان.. متهم بقتل المتظاهرين فى 25 يناير، وهناك شبهة بإن إيده فيها دم فى الدفاع الجوى".

واستطرد الإعلامى المعروف: "مرتضى قلب على عكاشة.. بيقلب على أى حد حتى ابنه.. بيبيع أى حد.. إنما أنا مبتبعش ولحمى مر ومكمل للآخر ويارب أدخل السجن.. أنا مش خدام ولا مدفوع لى فلوس ولا متجوز بنتك.. يا أنا يا إنت.. ومستعد أقابلك فى أى مكان راجل لراجل، واللى عنده بلاغات ضد مرتضى يقدمها.. محدش يخاف"، مضيفا: "لو إنت شغال عند مين، أنا ومصر أهم، وحرية المصريين أهم، ولن نسمح بالتطاول مرة أخرى، وأنا قاعدلك على الواحدة ومش هسيبلك غلطة".

وواصل "أديب" هجومه على مرتضى منصور قائلًا: "أنا مش بضرب على قفايا وأجى اعتذر، وعمرى ما عملتها ولا عمرى هاعملها.. كان غيرك أكبر.. خلاص بقا.. فاض الكيل وإما اعتدلت أو اعتزلت.. وأنا وراك.. كل اللى ورايا واللى قدامى.. أنا مش هاسكت ولا يهمنى ولا تفرق معايا، ومش هعتذر ولن أتصالح لو آخر يوم فى حياتى.. يا أنا يا أنت.. مين يقول للعورة أنتى عورة، ومين يقول للغولة أنت عينك حمرا.. أنا هقولك حمرا.. هى مش عزبة ولا ماسحين على قفانا.. ولا عينينا مكسورة.. إحنا أشراف وطول عمرنا أشراف".