عمرو أديب: من النهارده مفيش مرتضى

أطلق الإعلامى عمرو أديب، نيرانه على مرتضى منصور، عضو مجلس النواب، متوعدا إياه بالرد القاسى دون رحمة، مؤكدًا أنه لن يقبل بالتصالح أو الاعتذار، وذلك بعد تدشين الأخير حملة تحت قبة البرلمان لإغلاق برنامج "القاهرة اليوم" الذى يقدمه أديب.


وقال عمرو أديب، فى برنامجه "القاهرة اليوم"، المذاع عبر فضائية "اليوم": "لقد قررت الدخول فى هذا الموضوع للنهاية.. لن نعيش تحت إرهاب أو ابتزاز ولن نسمح أن يسىء أحد للسمع وخدش حياء الآخرين، والبرنامج بيقول للأعور أنت أعور فى عينك"، مستطرداً: "قررت المواجهة وليس لدى ما أخشاه أو أخشى عليه.. مرتضى واخد المجلس زيارة ومقاولة ولحسابه، وأقنعهم بالكذب ومفيش توقيعات وناس توقيعاتها مزورة والبعض أنكر ذلك".

وأضاف: "أنا واقف.. اللى عاوز يبقى معايا أهلا وسهلا.. اللى مش عايز أنا واقف قدامك للنهاية.. مرتضى عاوز يوقف البرنامج قبل الاثنين القادم وقبل حلقة ميدو".

مرتضى هدد بتكسير استوديو القاهرة اليوم

وتابع: "مرتضى كلم الإدارة وهدد بإرسال ناس لتكسير الاستوديو.. ياريت يا أخى تعالى راجل لراجل وورينى نفسك.. إحنا رجالة طول عمرنا وتربينا رجالة وعمرنا ما خوفنا.. كان غيرك أشطر.. أنت كنت تحت السرير وكنت عارف مين اللى كان بيحميك.. فاكر ولا لأ.. المجتمع عارف بس بينافقه.. أنا باخد حقى بدراعى.. وعارف أخده كويس.. مبخفش ومكمل للآخر يا أنا يا أنت فى مصر.. عمرو عمره ما خاف ولا تراجع وحلقة ميدو هتتذاع إلا إذا أنت عملت حاجة فى ميدو".

أديب يتوعد مرتضى منصور

وتابع: "مادام محدش بيلمك أنا اللى هلمك وأنا واقف قدامك ومش هسكت.. ولو تعرف أنا معايا إيه والله مش هتقعد فى مصر.. أنت كنت على السرير يا بنى.. أنت ناسى ولا إيه.. وعاوز يبقى رئيس لجنة حقوق الإنسان.. متهم بقتل المتظاهرين فى 25 يناير، وهناك شبه بأن إيده فيها دم فى الدفاع الجوى".

وقال أديب ببرنامجه: "مرتضى قلب على عكشه.. بيقلب على أى حد سواء ابنه.. بيبيع أى حد.. إنما أنا مبتبعش ولحمى مر ومكمل للآخر ويارب ادخل السجن.. أنا مش خدام ولا مدفوع لى فلوس ولا متجوز بنتك.. يا أنا يانت ومستعد أقابلك فى أى مكان راجل لراجل، واللى عنده بلاغات ضد مرتضى يقدمه..محدش يخاف"، مضيفاً: "لو انت شغال عند مين أنا ومصر أهم وحرية المصريين أهم ولن نسمح بالتطاول مرة أخرى وأنا قاعدلك على الواحدة ومش هسيبلك غلطة".

عمرو أديب لـ"مرتضى": "بقولك حمرا"

وحذر أديب، مرتضى قائلاً: "أنا مش بضرب على قفايا وأجى اعتذر وعمرى ما عملتها ولا عمرى هعملها.. كان غيرك أكبر.. خلاص بقا.. فاض الكيل وإما اعتدلت أو اعتزلت.. وأنا وراك.. كل اللى ورايا واللى قدامى"، مستطرداً: "مرتضى يتنفس كذباً دون أن يقدم شيئا للوطن.. أنا مش هسكت ولا يهمنى ولا تفرق معايا ومش هعتذر ولن أتصالح لو آخر يوم فى حياتى.. يا أنا يا أنت.. مين يقول للعورة أنتى عورة ومين يقول للغولة أنت عينك حمرا.. أنا هقولك حمرا.. هى مش عزبة ولا مسحين على قفانا ولا عينينا مكسورة..إحنا اشراف وطول عمرنا أشراف".

أديب لـ"مرتضى" مراتك كانت تكلمنى عشان يدخلولك الأكل فى السجن

وتابع: "أنا راضى عن نفسى جداً ولو تم إغلاق البرنامج هعمل قناة على اليوتيوب"، مستطرداً: "يوم ما اتسجنت يامرتضى ابنك جاء إلى القناة السعودية ليناشد حسنى مبارك..ومراتك وبنتك كانوا يكلمونى كل يوم على الفطار عشان يدخلولك الأكل فى سجنك.. مراتك جات هنا على القناة السعودية.. القاهرة اليوم أكبر منك.. ولا يهمنى ما تقول، أنت بتألف وأبو لمعه الأصلى وياخسارة مكنش نفسى أعمل فيك كدا ولا انزل لهذا المستوى، ولكن إذا كان لهذا البلد أن ينظف فلا بد أن يكون هناك من يقف ويقول لا..كدا كفاية ولم نفسك ومش ورايا حاجة..وهرد عليك بالأسامى واحدة واحدة".

مرتضى ليس مستشاراً

وواصل أديب هجومه قائلاً: "أنت مش مستشار وتوفيق عكاشة مش دكتور"، مضيفاً: "أموت وأعرف ميدو عارف عنك إيه..فيه إيه!"..مستطرداً: "أنا أول حد طلع مرتضى فى الإعلام وكان بيعمل فقرة عندى.. وبقولكم محدش يخاف واللى عاوز يعمل هشتاج ويقدم بلاغ ضد مرتضى يقدم...اليوم أكسر حاجز الخوف وعاوز الناس تدخل ورايا..الخوف انتهى.. معقولة دا ينفع رئيس لجنة حقوق الإنسان!..ميدو جاى..ولو جاى تكسر انت ورجالتك هقفلك أنا ورجالتى وهاخد حقى بدراعه وبالعافية..ودا دراعى ومستعد فى أى مكان وهفضل عمرو أديب وأنت هتفضل مرتضى منصور".