نور الشربينى: نفسى أقابل الرئيس

فى أول حوار صحفى لها عقب عودتها إلى القاهرة، بعد تحقيقها إنجازا تاريخيا لها ولمصر، أجرى "برلمانى" حوارا مع نور الشربينى، الفتاة المصرية التى حققت إنجازا رياضيا بحصولها على بطولة العالم فى الإسكواش كأول مصرية وأصغر من يحصل عليها على مستوى العالم.

تعرف على مشوار حياة نور

كيف رأيتى احتفال المصريين بإنجازك؟

فرحتى متتوصفش، من أكثر ما يسعدنى هو أننى حققت شيئا لوطنى، وأننى تسببت فى إسعاد المصريين ورسم البسمة على وشوشهم، ودى أكتر حاجة ممكن تفرحنى بالبطولة وبانجاز أنى أصغر من حصل على البطولة.

المهندس محمد فرج عامر قال إن الرئيس عبد الفتاح السيسى سيكرمك.. إيه اللى ممكن تقوليه له إذا قابلك الرئيس؟

أولا أنا طبعا نفسى أقابله، ومين ميحبش يقابل السيسى، ثانيا أنا مش هقوله حاجة لأنه هو بصراحة مش ناقص، ولو كنت هقوله "خلى بالك علينا وعلى مصر" فأنا واثقة أنه بيعمل كده.

من كان فى استقبالك فى المطار؟

أنا وصلت مطار الإسكندرية لأننى من الإسكندرية، واستقبلنى مدير المطار، ورئيس اتحاد الإسكواش، وأعضاء نادى سموحة.

من أكثر شخص دعمك حتى حصلتى على البطولة؟

بصراحة عائلتى كلها، كانوا دايما ورايا، وكمان سافروا معايا للبطولة لماليزيا لتشجيعى، وكمان المهندس محمد فرج عامر، رئيس نادى سموحة، وكان يدعمنى منذ طفولتى، وعمرى ما هقدر أنسى وقفته جمبى.

إيه الرسالة اللى عايزة توجهيها لنواب البرلمان وأعضاء لجنة الشباب والرياضة لدعم أبطال الألعاب الفردية؟

نفسى أقولهم ياخدوا بالهم من الشباب والأبطال اللى فى ألعاب فردية واللى ممكن يحققوا بطولات كتير أوى لبلدهم لو اهتمينا بيهم، ومش كل حاجة كرة قدم، وفى بنات وولاد كتير عاملين إنجازات ومحتاجين دعم.

هل ضايقك ماقيل منذ شهرين عنك وبعض الهجوم الذى وجهه لكِ البعض على "الفيس بوك" بسبب ملابسك؟

بصراحة كنت متضايقة فى الأول، لكن أهلى دعمونى، وتخطيت الفترة دى، وكنت عارفة إن النجاح ليه إيجابيات وليه سلبيات، لكنى لما حققت البطولة نسيت كل حاجة، وحسيت أن الحلم اللى حققته أكبر بكتير من أى نقد، خاصة أن مفيش بنى آدم مش بيتم انتقاده.

تعرف على الهجوم الذى واجهته

وما أكثر شىء ستركزين عليه المرحلة المقبلة فى حياتك؟

سأهتم بدراستى، وسأتابع تدريباتى، ولن يتوقف حلمى فى التعليم أو فى الإسكواش، وأنا اتعلمت من صغرى أنى أوزن بين دراستى وبين الإسكواش.

طب والعرسان والمعجبين اللى كتروا بعد نجاحك؟

لا قولهم يستنوا شوية، لأنى ورايا حلم فى دراستى وأحلام أكبر فى الإسكواش.