تحدث الرئيس عبدالفتاح السيسى، عن مشروع البلازما قائلا: "وأنا وزير للدفاع فكرت فى مشروع البلازما والدولة المصرية فكرت فيه ومنجحتش.. لكن تم وضع الهدف والإصرار عليه.. الموضوع ده كان من ساعة 2012 وأنا بحاول المشروع ده يطلع النور.. فى الوقت ده كل الشركات العالمية اللى لها اسم ممكن تستخدم لم تتعاون معنا واحنا مٌصرين نجيب ونتكلم وندى كل حاجة بس نعمل المشروع على أسس".
وأضاف الرئيس السيسى، خلال جلسة العدالة الاجتماعية والصحة، ضمن فعاليات اليوم الثالث والأخير لمؤتمر حكاية وطن "بين الرؤية والإنجاز، وتبقا شراكة تحمل اسم الشركة العالمية وتبقا معانا فى كل الإجراءات علشان المصداقية الكاملة للاسم اللى هنتحرك فيه".
وأعلن الرئيس السيسى عن موعد افتتاح المشروع قائلا: " خلال عام 2026 سيتم افتتاح مشروع إنتاج البلازما".
وقال الرئيس عبدالفتاح السيسى، إنه حتى عام 2019 لم نكن نستطيع عمل مشروع تجميع البلازما، معقبا بالقول: "لغاية 2019 ما أمكنش نعمل المشروع.. لكن إحنا مصرين إن نعمل كده لغاية لما جت كورونا فعملت تغيير فى الفكر العالمى للموضوع ده فكانت الفرصة متاحة".
وأضاف الرئيس السيسى، خلال جلسة العدالة الاجتماعية والصحة، ضمن فعاليات اليوم الثالث والأخير لمؤتمر حكاية وطن "بين الرؤية والإنجاز": "لما تلاقى تغيرات عالمية اوعى يفوتك تستفيد منها فى الوقت ده لقينا ان الناس بتفكر فى تشكيل خريطة مختلفة واستعدوا يشتغلوا معانا وتم عمل اتفاق وكنا عاوزين المصنع خلال 2026 يكون شغال هنا فى بلدنا".
وتابع الرئيس: "الموضوع ده اعتبرته جزء من تصحيح العادات المصريين لو قدرنا نخليه مشروع قومى لإنتاج البلازما لأن المعايير المستخدمة فى قبول العينات صارمة جدا .. لو عملت مركز فى أى جامعة يبقا كل الشباب والشابات اللى لو حبوا يتبرعوا فى هذا المركز لازم يحافظوا على المسار الصحى والعادات الصحية هتسيب أى خلل مش مقبول".
وواصل الرئيس: "دخل المتبرع كتقدير وشكر من المراكز لو مرة فى الأسبوع كام فى الشهر؟ طيب لو مرتين؟ رقم معتبر ممكن يتقدم فى مصر ملايين والحلم كان ملايين يبقا انا قدرت اجيب دخل من فكرة.. وتبقا البلازما موجودة فى مصر ويبقى مسار صحى محترم هى دى قصة البلازما.. عملنا 8 مراكز ومستهدف 20 و 50 و 100 فى المرحلة دى.
وأكمل الرئيس: "طيب هتشوفوا معايير للدول المتقدمة ازاى بتتعامل مع الشأن الصحى بشكل احنا هنتعلم منه كتير، لان الكلام ده بيتم اعتماده من الشركة الأسبانية وبتشرف عليه بشكل صارم جدا واحنا بعادتنا مبنهتمش بالكلام ده".
وعَلًّقَ الرئيس السيسى، على حديث وزير الصحة بخصوص اكتشاف مرض سرطان الثدى فى المرحلة الأولى 29% بأنها نسبة غير مرضية ولا بد أن تكون صفر.
وقال الرئيس: "لا بد من الكلام وشرح الأفكار وأن النسبة غير مرضية، ولا بد أن لا يرضى عنها المصريون ولا بد أن نعلم الناس كيف تكشف على نفسها وندعوا البنات أنها تتعلم انهم يخلوا بالهم من الموضوع ده علشان ما تتجرحش ولا يتكسر خاطرها، لأن أى حاجة من دى لما نعرفها بدرى بتبقى تكلفتها قليلة ومش بنتكلم فى التكلفة هنا، وهذا ما جعلنا نقوم بالمباردة لدينا فرصة للشرح لأن النسبة 29% كتير وممكن نخليها صفر، وبدل أن نلح على المطبخ فى القنوات الـ4 كل شوية مطبخ مطبخ، مفيش برنامج شوفته بيتكلم فى عادات صحية ورياضية محدش بيتكلم فيه خالص، لازم يبقى فى توعية مش علشان إحنا مش قادرين نعالج لكن علشان اللى بيتأذى بيتألم واحنا مش عاوزين حد يتألم".
وقال الرئيس عبد الفتاح السيسى، إن الدولة المصرية حريصة على أن يكون بها صناديق يمكن من خلالها تجميع أموال لتستثمر وتستخدم عوائدها فى خدمات كثيرة.
وأضاف الرئيس السيسى ضاحكا: "هى أفكار ولو أنا اديت الفلوس كلها للدكتور معيط ولا قد كده 10 مرات.. اللى هدهوله خلاص.. ولو كان بيدى كان أعطى وزير الصحة، الفكرة كلها وبقولها للناس فى مصر، أنا عمرى ما اتكلمت عن الصندوق ده، وقلت للناس إذا كنتوا عايزين تقدموا حاجة لبلدكم صندوق تحيا مصر يقوم بدور كبير جدا، ويقوم بدور فى أى حاجة نتزنق فيها نقول خدوا من الصندوق مليار أو 2، وبالمناسبة الفلوس الموجودة فى الصناديق دى تحت إشراف مباشر ليا أنا".
